पोखरा(हाम्रो खेलकुद) – काठमाडौं नैकापको न्यू डायमण्ड एकेडेमी पोखराको लामाचौरमा हिन्दु नारीहरुको महान तीज पर्वको अवसरमा आयोजना हुने राष्ट्रिय महिला भलिबलको सर्वाधिक सफल टिम हो ।

फाइल तस्बिर

दोस्रो संस्करणदेखि लगातार पाँचौ संस्करणसम्मको च्याम्पियन डायमण्डले मंगलबार विभागीय नेपाल पुलिसविरुद्ध खेल्दै छैटौं संस्करणको रेडबुल महिला राष्ट्रिय भलिबलको उपाधि रक्षा गर्ने अभियानका साथ मैदान उत्रनेछ । भर्खरै शिवम सिमेन्टको मुख्य प्रायोजन पाएको डायमण्डका मुख्य प्रशिक्षक कुमार राईले प्रतियोगिताको लागि तयार रहेको बताए ।

‘हामी यस प्रतियोगिताको डिफेन्डिङ च्याम्पियन टिम हौं । यसपटक पनि उपाधि जित्ने हाम्रो लक्ष्य हुनेछ ।’ प्रशिक्षक राईले भने, ‘भर्खरै शिवम् सिमेन्टको मुख्य प्रायोजनको साथ पाएका छौं । यसले हामीलाई खेल्नमा थप हौसला पुगेको छ । आशा छ यसपटक पनि हामी पोखराबाट उपाधि लिएर काठमाडौं फर्कने छौं ।’

रेडबुल राष्ट्रिय महिला भलिवल प्रतियोगिता भोलिदेखि शुरु हुदैछ । उद्घाटन खेलमा डिफेन्डिङ च्याम्पियन शिवम न्यू डायमण्ड एकेडेमी र विभागीय नेपाल पुलिस क्लबबीच प्रतिस्पर्धा हुने प्रतियोगिता संयोजक सुशिल कुमार श्रेष्ठले जानकारी गराए ।

तीन दिनसम्म चल्ने प्रतियोगितामा राष्ट्रिय स्तरको पाँच टिमको सहभागिता रहेको छ । समूह ‘ए’ मा न्यू डायमण्ड र नेपाल पुलिस क्लब तथा समूह ‘बी’ मा नेपाल एपिएफ क्लब, पश्चिमाञ्चल र जावलाखेल भलिबल प्रशिक्षण केन्द्र रहेको छ ।

यस्तै तीज महोत्सव अन्र्तगतको राष्ट्रिय स्तरको महिला भलिबल प्रतियोगितालाई मुख्य प्रायोजनको रुपमा इनर्जी ड्रिङ्स रेडबुल रहेको संयोजक श्रेष्ठले जानकारी गराए । त्यस्तै तीज महोत्सवको मुख्य प्रायोजक भने कैलाश विकास बैंक रहेको छ । तीज महोत्सव अन्र्तगत ४ गतेदेखि सुरु भएको अन्तर विद्यालय छात्रा भलिबल प्रतियोगिताको उपाधि पपोखराको करुणानिधि एजुकेशन फाउन्डेसनले जितेको छ । फाउन्डेसनले पाहुना टोली इशानेश्वर मावि भोर्लेटार लमजुङलाई ३–१ को सेटमा पराजित ग¥यो । पहिलो सेट २३–२५ ले गुमाएको फाउन्डेसनले लगातार तीन सेट २५–९, २५–१८ र २५–१० ले आफ्नो पक्षमा पार्दै उपाधि जित्न सफल भयो । प्रतियोगितामा इशानेश्वर माविकी गंगाा गुरुङ उत्कृष्ट खेलाडी घोषित भईन् ।

नव आदर्श सामुदायिक विकास समाज लामाचौरको आयोजनामा सञ्चालन हुने प्रतियोगिताको विजेताले ७५ हजार, उपबिजेताले ५० हजारको साथमा ट्रफी, मेडल र प्रमाणपत्र प्राप्त गर्नेछन् । तेश्रो हुनेले २० हजार र सान्त्वना हुनेलाई १५ हजार प्राप्त गर्ने आयोजकले जनाएको छ । त्यस्तै, बेष्ट प्लेयर, बेस्ट क्विकर, बेस्ट लिव्रो, बेस्ट स्पाइकर, बेस्ट ब्लकर, बेस्ट सर्भर, बेस्ट डिफेन्डर र बेस्ट कोचलाई पुरस्कार स्वरुप ट्रफी र घडी उपहार प्राप्त गर्नेछ । लिग कम नकआउटका आधारमा सञ्चालन हुने प्रतियोगिताका सबै खेलहरु इन्द्रराज्यलक्ष्मी माविको परिसरमा संचालन हुनेछ ।