काठमाडौं (हाम्रो खेलकुद) – विभागीय नेपाल पुलिस क्लब रोल्पामा जारी प्रथम सभामुख कप राष्ट्रिय महिला तथा पुरुष भलिबल प्रतियोगिताको दोहोरो उपाधिनजिक प्रवेश गरेका छन् । पुलिस पुरुष र महिला दुवै तर्फको फाइनलमा प्रवेश गरेका हुन् ।

रोल्पाको सदरमुकाम लिवाङमा भएको पुरुषतर्फको सेमिफाइनलमा पुलिसले अर्को विभागीय टोली नेपाल एपीएफ क्लबलाई ३–१ को सेटमा पराजित गर्दै उपाधिनजिक पुगेका हुन् ।

सुरुआती दुई सेट समान २५–१६ ले जितेको पुलिसले तेस्रो सेट २४–२६ को प्रतिस्पर्धात्मक सेटमा गुमाएको थियो । तर, चौथो सेट पुलिसले २५–२१ ले सहज आफ्नो पक्षमा पार्यो । अब पुलिसले उपाधिको लागि बुधबार अर्काे विभागीय टोली त्रिभुवन आर्मी क्लबको सामना गर्नेछ । आर्मीले प्रदेश नम्वर ४ लाई २७–२५, २५–२० र २५–२१ को सोझो सेटमा पराजित गरेको थियो ।

महिलातर्फ पुलिसले त्रिभुवन आर्मी क्लबमाथि २५–२०, २५–१७ र २५–१० को सहज जित निकाल्यो । वर्षको नयाँ सिजनमा पुलिस लगातार दोस्रोपटक उपाधिनजिक पुगेको हो ।पुलिस शेरबहादुर खड्का स्मृति प्रतिष्ठानले आयोजना गरेको महिला भलबलमा पराजित भएको थियो । अब पुलिसले उपाधिको लागि भलिबलमा सशक्त टोली एपीएफको सामना गर्नेछ । एपीएफले मंगलबारै प्रदेश नम्वर ५ लाई २५–६, २५–८ र २५–१३ को सहज जित निकाल्यो ।

महिलातर्फ आर्मी र पुरुषतर्फ प्रदेश ४ ले तेश्रो स्थान हात पारे । प्रतियोगितामा सहभागी महिला र पुरुष दुवै टिमलाई चार समूहमा विभाजन गरि लिगकम नकआउटका आधारमा प्रतिस्पर्धा भएको थियो । दुवै समूहका विजेताले समान ३ लाख ५० हजार पाउनेछ । उपविजेताले २ लाख र तेश्रो हुनेले १ लाख नगद पुरस्कार पाउने छन् ।