काठमाडौं (हाम्रो खेलकुद) – नेपाल ब्याडमिन्टन संघ यसै महिनाको अन्त्यमा नेपाल बिडब्लूएफ अन्तर्राष्ट्रिय सिरिज २०१६ आयोजना गर्ने भएको छ । ब्याडमिन्टन वल्र्ड फेडेरेसन (बिडब्लूएफ) र ब्याडमिन्टन एसियाको स्वीकृतिमा हुने सिरिजमा नेपालसहित एसियाका १३ राष्ट्रका खेलाडीको सहभागिता रहने संघले आइतबार नेपाल खेलकुद पत्रकार मञ्चमा आयोजित पत्रकार सम्मेलनमा जानकारी दिए ।

राष्ट्रिय खेलकुद परिषद् (राखेप) र नेपाल ओलम्पिक कमिटी (एनओसी) को सहयोगमा मंसिर २८ देखि पुस २ गते सम्म सिरिज राखेपको त्रिपुरेश्वरस्थित कभर्ड हलमा सञ्चालन हुनेछ । सिरिजमा नेपाल टेलिकम, सनराइज बैंक, सामसुङ र योनेक्सले प्रायोजनाका लागि इच्छा देखाइरहेको संघले जनाएको छ । ६ हजार अमेरिकी डलर पुरस्कार रहेको प्रतियोगितामा नेपालसहित सिरिजमा भारत, बंगलादेश, भुटान, पाकिस्तान ,माल्दिभ्स ,भियतनाम, मलेसिया, इरान, फिलिपिन्स ,श्रीलंका ,इन्डोनेसिया र सिरियाका खेलाडीले भाग लिनेछन् ।

सिरिजमा विभन्न ५ इभेन्ट्समा प्रतिस्पर्धा हुनेछ । मेन्स सिंगल, वमन सिंगल, मेन्स डबल, वमन्स डबल र मिक्स डबलमा गरि ९४ खेलाडीको सहभागिता रहनेछ । मेन्स सिंगलमा ३२, वमन सिंगल्समा २३ जनाले प्रतिस्पर्धा गर्नेछन् । त्यस्तै मेन्स डबलमा १४ र वमन्स डबलमा १२ जोडीले भाग लिनेछन् । मिक्स डबल्समा १३ जोडीबीच प्रतिस्पर्धा हुनेछ । ५ विधाका विजेता, उपविजेताले कुल ६ हजार अमेरिकी डलर पुरस्कार प्राप्त गर्नेछन् ।

नेपालले केही साताअघि पाकिस्तानमा आयोजना भएको अन्तर्राष्ट्रिय सिरिजको मिक्स डबल्समा स्वर्ण पदक जितेको थियो । तामाङ दिदिभाई नङ्सलदेवी र रत्नजितले नेपाललाई स्वर्ण पदक दिलाएका थिए । ब्याडमिन्टनमा नेपालको त्यो अहिले सम्मकै ठूलो सफलता हो । आठ बर्षपछि संघले अन्तर्राष्ट्रिय प्रतियोगिता आयोजना लागेको हो । यसअघि सन् २००८ मा सहित संघले ५ वटा अन्तर्राष्ट्रिय प्रतियोगिता आयोजना गरिसकेको र भविष्यमा पनि यस्तो प्रतियोगिता आयोजनाका लागि पहल गर्ने जनाएको छ ।

यस्ता अन्तर्राष्ट्रिय प्रतियोगिता बिडब्लूएफको सदस्य राष्ट्रले मात्र आयोजना गर्ने अधिकार पाउछ । ४१ जिल्ला संघ रहेको ब्याडमिन्टन संघले केही बर्षमै ६० जिल्लामा संगठन विस्तार गर्ने लक्ष्य राखेको बताइएको छ ।