काठमाडौं (हाम्रो खेलकुद)– चौथो अन्तरस्कुल खेलकुद प्रतियोगिताको ब्याडमिन्टनमा न्यू डायमण्डकी दिक्षिता लामिछाने र टेबल टेनिसमा ग्रिन भ्यालीकी जायशा तामाङ विजयी भएकी छिन् ।

त्रिभुवन विश्वविद्यालयको मास्र्टस प्रोग्राम इन स्पोर्टस साइन्सको चौथो ब्याचको आयोजनामा शनिबार अन्तर स्कुल खेलकुद प्रतियोगिता भएको थियो ।

प्रतियोगितामा गल्र्स ब्याडमिन्टन र टेबल टेनिसमा बानेश्वरको श्रृष्टी एकेडेमी, न्यू डायमण्ड एकेडेमी, ग्रिन भिलेज एजुकेसन फाउन्डेसन, पृथ्वी मावि र तारा मावि गरि ५ विद्यालयका २४ खेलाडीको सहभागिता रहेको थियो । दुबैतर्फ समान १२ खेलाडीले प्रतिस्पर्धा गरेका थिए ।

न्यू डायमण्डका खेलाडी ब्याडमिन्टनको शीर्ष चारमा आए । फाइनलमा दिक्षिताले सारिका खड्कालाई २१–१३,२१–१२ लाई हराउँदै च्याम्पियन बनिन् । कृपा मगर तेस्रो र करुना गिरी चौथो भईन् ।

टेबल टेनिसको फाइनलमा जायशाले आफ्नै स्कुलकी विभिषा थापालाई ११–१३,११–२,११–७ र ११–९ लाई हराउँदै पहिलो स्थान प्राप्त गरिन् । श्रृष्टीकी अमृता राउत तेस्रो र ग्रिन भ्यालीकी रसिका देशार चौथो भइन् ।

स्पोर्टस युनिभर्सले प्रायोजन गरेको प्रतियोगिताका विजेतालाई राष्ट्रिय खेलकुद परिषद्का सदस्य अन्जन धमला, ओलम्पियन दीपक विष्ट, सुदूरपश्चिम तेक्वान्दो संघका उपाध्यक्ष केशव भट्टलगायतले पुरस्कृत गरे ।