काठमाडौं (हाम्रो खेलकुद)– त्रिभुवन आर्मी क्लबकी रसिला महर्जन र एपिएफका प्रिन्स दाहालले शनिबार प्रथम प्रकाश दाहाल स्मृती राष्ट्रिय खुल्ला ब्याडमिन्टन प्रतियोगिताको उपाधि जितेका छन् ।

महिला एकलको फाइनलमा रसिलाले आफ्नै क्लबकी अनुमाया राईलाई हराएकी थिइन् । उनले २१–३ र २१–१४ ले खेल जितेकी थिइन् । आर्मीकी अमिता गिरी र कस्तुरी कलेजकी सिमा राजवंशी संयुक्त रुपमा तेश्रो भए ।

स्पोर्टस् हवको आयोजनामा भएको प्रतियोगिताको पुरुष एकलको फाइनलमा प्रिन्सले आर्मीका प्रफुल महर्जनलाई २–० को सोझो सेटले हराएका थिए । प्रिन्सले २१–१६ र २१–१६ को जित निकालेका थिए । एपिएफका देव राज राना र नेपाल पुलिस क्लबका विष्णु कटुवालले संयुक्त रुपमा तेस्रो भए ।

बौद्ध लाखेपोखरीस्थित आयोजकको आफ्नै कभर्डहलमा भएको प्रतियोगिताको स्थानिय तर्फ आयोजक स्पोर्टस् हवका अनुज तामाङ्ग र सुमित थोकरको जोडीले उपाधि जित्यो । अनुज र सुमितको जोडीले स्पोर्टस् हवकै अनिष गुरुङ्ग र रमेश ठकुरीको जोडीलाई १८–२१, २१–११ र २१–१३ ले हरायो । ध्रुव खत्री र लाक्पा तामाङ्गको जोडी तथा अश्मिल शाही र लाक्पा शेर्पाको जोडी संयुक्त रुपमा तेश्रो भयो ।

पुरुष शिर्ष २० बरियता बाहेकको युगल तर्फ कास्कीका विधान अधिकारी र आर्मीका पविन लिनथेपको जोडीले उपाधि जित्यो । विधान र पविनको जोडीले आयोजकका अभिषेक गुरुङ्ग र निश्चल खत्रीको जोडीलाई २१–१४ र २१–१९ ले हरायो । एपिएफका भोज बहादुर गुरुङ्ग र सन्तोष पनेरुको जोडी तथा विवेक कन्दङ्गवा र नेल्सन राईको जोडी तेस्रो भयो ।

भेट्रान्स ३५ बर्ष माथिको खेलमा कास्कीका विशाल खड्का र आर्मीका सुरोज महर्जनको जोडीले उपाधि जित्यो । विशाल र सुरजको जोडीले फाइनलमा आयोजकका आकाश छन्त्याल र आङ्ग कुसाङ्ग शेर्पाको जोडीलाई २१–११ र २१–१४ ले पराजित गर्यो । चितवनका विद्वान गुरुङ्ग र अमर रायमाझीको जोडी तथा पिस फिटनेश सेन्टरका संजय कपाली र अनिल थाम्सुहाङ्गको जोडी तेस्रो भयो ।

४५ बर्ष माथिको प्रस्पिर्धामा चन्द्रागिरी ब्याडमिन्टन क्लबका हरि खत्री र राजकुमार पोखरेलको जोडीले फाइनलमा पिस फिटनेश सेन्टरका संजय कपाली र अनिल थाम्सुहाङ्गको जोडी २१–१४ र २१–१८ ले हराउँदै उपाधि जित्यो । गण्डकीका तिलक छन्त्याल र हिरा रोका तथा एपिएफका धिरेन्द्र चन्द र टोखाका टिका थापा मगरको जोडी संयुक्त रुपमा तेश्रो भए । प्रतियोगिताको विजेताले ट्रफी, पदकसहित ४५ हजार, दोस्रोले २५ र तेस्रोले १० हजार रुपैयाँ प्राप्त गरे ।

नेपाल ब्याडमिन्टन संघको मान्यता प्राप्त वरियता सहितको राष्ट्रिय प्रतियोगितामा पुरुष एकल, महिला एकल, पुरुष युगल (शिर्ष २० बरियता बाहेक), स्थानिय स्तर, मास्टर्स युगल ३५ बर्ष माथी र ४५ बर्ष माथी गरि ६ विधामा प्रतिस्पर्धा भएको थियो । पूर्व मन्त्री पम्फा भुषालले विजयी खेलाडीलाई पुरस्कृत गरिन् ।