काठमाडौँ (हाम्रो खेलकुद) – जर्मनीको डस्सलडर्फ सहरमा सोमबारबाट सुरु भएको विश्व टेबल टेनिस च्याम्पियनसिपमा नेपालको सिङ्गल्स इभेन्टमा यात्रा समाप्त भएको छ। नेपालका चारै खेलाडीले समुह चरणका सबै खेलमा हार व्येहोरेका थिए। मिक्स डबल्समा १ खेल जितेको नेपालले दोश्रो चरणमा भने हार व्येहोर्यो।

मिक्स्ड डबल्स अन्तर्गत शिवसुन्दर गोठे र स्वेच्छा नेम्वाङ्गको जोडीले ट्रीनिडाड एण्ड टोबेगोका डेकस्टर सेन्ट लुइस र रेहान चुङको जोडीसँग ११-७, ११-३ र ११-८को सोझो सेटमा पराजय व्येहोरे। अमर मल्ल र नविता श्रेष्ठको जोडीले भने बंगलादेशको महबुब बिल्लाह र मौमिता अलामको जोडीलाई सोझो सेटमा पराजित गरे। नविता र अमरको जोडीले ११-३, ११-४ र ११-३को सहज जित दर्ता गरेका थिए। दोश्रो चरणमा पुगेको नेपाली जोडीले पोल्याण्डका मरेक बडोस्की र क्लाउडीया कुसिन्सकासँग ११-७, ११-५ र ११-६को सोझो सेटमा पराजित हुँदै प्रतियोगिताबाट बाहिरिए।

महिला डबल्समा पहिलो चरणमा नेपालले बाइ पाएको थियो। नेपालकी स्वेच्छा नेम्वाङ्ग र नविता श्रेष्ठले पहिलो चरणको खेल नखेल्दै बाइ पाएपछि दोश्रो चरणमा प्रवेश गरेका छन्। उनीहरुले दोश्रो चरणमा डोमिनिकाको इभा ब्रिटो र एस्मेरलीन क्यास्ट्रोसँग भिड्दैछन्। नेपाली समयानुसार दिनको १:४५ बजे खेल हुनेछ।

पुरुषतर्फको डबल्समा भने नेपालका शिवसुन्दर गोठे र अमर मल्लले फिलिपिन्सका जाफेथ अदासा र शेर्विन रेमताको जोडीसँग पराजित भए।निकै प्रतिस्पर्धात्मक खेलमा नेपाली टोली १२-१०, ११-५, १५-१७ र ११-९ले पराजित भएको थियो।

पुरुष सिङ्गल्समा अमर मल्लले स्कटल्याण्डका क्रेज होवीसन र स्लोभाकियाका स्यामुएल नोभोटासँग ४-०को सोझो सेटमा पराजित हुँदै छनोट चरणबाट बाहिरिए।

अर्का खेलाडी शिवसुन्दर गोठेले पनि बुल्गेरियाका टेओदोर एलेक्जान्ड्रोभ र पुएर्टो रिकोका ड्यानीएल गोन्जालेजसँग ४-०ले नै पराजित हुँदै प्रतियोगिताबाट बाहिरी।यद्दपी उनले अझै समूहको एक खेल खेल्न बाँकी रहको छ।

महिलातर्फ भने नविता श्रेष्ठ सिंगापुरकि वानलिङ झाङ र स्विट्जरल्यान्डकि राहेल आस्वान्डेनसँग ४-० सोझो सेटमा पराजित भइन।

यसैगरी अर्की प्रतिस्पर्धी स्वेच्छा नेम्वाङ्गले फिनल्याण्डकि अन्निका लण्डस्टर्मसँग ४-० र इटालीकि डेबोरा भिभारेल्लीसँग ४-१ले पराजित रहँदै प्रतियोगिताबाट बाहिरीइन।