घोराही (हाम्रो खेलकुद) –नेपाल नम्बर एक खेलाडी दिदिभाई नङ्शलदेवी तामाङ र रत्नजित तामाङ आठौं राष्ट्रिय खेलकुद अन्तरगत ४०औं ब्याडमिन्टन राष्ट्रिय प्रतियोगिताको महिला र पुरुष एकलतर्फको क्वाटरफाईनलमा पुगेका छन् ।

आर्मीकी नङ्शलले आफ्नै क्लबकी गीता राईलाई २१–११ र २१–११ को अन्तरले पराजित गर्दै अन्तिम आठमा स्थान बनाइन् । आर्मीाबाटै खेलेका भाई रत्नले पुलिसका पूर्ण बहादुर थापालाई २१–११ र २१–७ ले पराजित गर्दै दोश्रो चरण प्रवेश गरे ।
यस्तै महिला एकलतर्फ आर्मीकी रशिला महर्जन, अनुमाया राई, रञ्जना भट्ट र लोक्तमा राईले पनि दोश्रो चरणमा स्थान बनाए । रशिलाले एपिएफकी अञ्जना राईलाई २१–१२ र २१–७ ले, अनुले प्रदेश १ की अरुण तामाङलाई २१–११ र २१–५ ले, रञ्जनाले सुदूरपश्चिमकी निलिमा महरालाई २१–६ र २१–८ ले तथा लोक्तमाले प्रदेश ३ की मनिण खड्कालाई २१–१४ र २१–१० ले हराइन् ।
एपिएफका जेशिका गुरुङ, शोभा गौचन र सुनैना मुखिया पनि क्वाटरफाइनलमा पुग्न सफल भए । जेशिकाले प्रदेश ५ की सुष्मा श्रेष्ठलाई २१–१० र २१–९ ले, शोभाले सुदूरपश्चिमकी बिष्णा बिष्टलाई २१–१४ र २१–१० तथा सुनैनाले प्रदेश १ की रोज पाण्डेलाई २१–१०, १९–२१ र २१–१६ ले पाखा लगाइन् ।
दोश्रो चरण प्रवेश गर्नेमा प्रदेश ५ की सम्झना शर्मा, प्रदेश १ की निता लम्साल, सिता राई, सिमा राजबंशी, प्रदेश ३ की सफी खत्री, गण्डकी प्रदेशकी पुनम गुरुङ, कर्णाली प्रदेशकी अग्रीमा भण्डारी र सुदूरपश्चिमकी प्रसुना खत्री छन् ।
घोराहीस्थित कभर्डहलमा भएको प्रतियोगिताको पुरुष एकलतर्फ एपिएफका दिपेश धामी प्रदेश ३ का रमेश श्रेष्ठलाई पराजित गर्दै क्वाटरफाइनलमा प्रवेश गरे । एपिएफका गौतम कठायत, विजित थापामगरले पनि अन्तिम आठमा स्थान बनाए । गौतमले प्रदेश ५ का विश्वास नेपाललाई २१–१२ र २१–१२ ले तथा विजितले एपिएफकै निरञ्नन देवकोटालाई १५–२१, २१–१३ र २१–१२ ले पराजित गरे ।
टिम इभेन्ट्समा रत्नजितलाई पराजित गरि सनसनी मच्चाएका अन्तर्राष्ट्रिय पदकधारी सुदूरपश्चिमका प्रिन्स दाहालले एपिएफका सुमन लिम्बुलाई २१–१८ र २१–७ ले पराजित गर्दै दोश्रो चरण प्रवेश गरे । यसैगरि पुरुष एकलमा सेनाका विशाल खड्का, प्रफुल महर्जन, नविन श्रेष्ठ र रुकेश महर्जन, पुलिसका बिष्णु कटुवाल, सुनिल जोशी र दीपक बोहरा, प्रदेश १ का विकाश श्रेष्ठ र सुदूरपश्चिमका देवराज शर्माले पनि पहिलो चरण पार गरे ।
एपिएफका दीपेश धामी र विजित थापामगरको जोडी पुरुष युगलतर्फ पनि दोश्रो चरण प्रवेश गर्न सफल भए । दीपेश र विजितको जोडीले प्रदेश ३ का विश्वास नेपाल र गणेश रायमाझीको जोडीलाई २१–१८ र २१–१९ ले हराएको थियो ।