एजेन्सी – पाँचपटकको च्याम्पियन तथा तेस्रो वरीयताका स्वीस रोजर फेडेरर युएस ओपन टेनिसको क्वाटरफाइनलबाटै बाहिरिएका छन् ।

बुधबार बिहान भएको प्रतिस्पर्धात्मक खेलमा फेडेरर बुल्गेरियाका ७८औं वरीयताका ग्रिगर दिमित्रोभसँग ३–२ को सेटमा पराजित हुदै क्वाटरफाइनलबाटै बाहिरिएको हो ।

न्युयोर्कस्थित सेन्ट्रल कोर्टमा भएको निकै प्रतिस्पर्धात्मक खेलमा फेडेररले पहिलो सेटमा ६–३ को सहज जित निकालेको थियो । दोस्रो सेट ४–६ ले गुमाएको फेडेररले त्यसपछिको सेट पुनः ६–३ ले आफ्नो पक्षमा पार्दै खेलमा २–१ को सेटमा अग्रता बनाएको थियो । त्यसपछिको दुवै सेट ३८ वर्षीय फेडेररले ४–६ र २–६ ले गुमाउदै प्रतियोगिताबाट बाहिरियो ।

फेडेररलाई पराजित गरेपछि दिमित्रोभले आजको खेलमा फेडेरर आफ्नो स्थानमा सर्वश्रेष्ठ नरहेको र मैले हरेक अवसरको प्रयोग गर्दा जित निकाल्न सकिएको बताए । दिमित्रोभसँग पराजित भएपछि २० पटकको ग्रान्डस्लाम च्याम्पियन फेडेररले राम्रै खेलेपनि कमजोर खेलेको जस्तो महसुस भएको बताएका छन् ।

अब दिमित्रोभले सेमिफाइनलमा पाँचौ वरीयताका रसियन ड्यानिल मेडभेडेवसँग खेल्नेछ । मेडभेडेभले स्वीस वावारिन्कामाथि ३–१ को जित निकाल्दै सेमिफाइनलमा स्थान पक्का गरेको थियो ।

क्वाटरफाइनलमा आज राति दोस्रो वरीयताका स्पेनिस राफायल नाडालले अर्जेन्टिनाका डिएगोसँग खेल्नेछ ।