काठमाडौं (हाम्रो खेलकुद)– झण्डै तीन वर्ष अघि स्वदेशमा आयोजना भएको १३ औं दक्षिण एसियाली खेलकुद (साग) की कीर्तिमानी पदक विजेता पौडी खेलाडी गौरिका सिंह नवौं राष्ट्रिय खेलकुदमा भाग लिन दुई सातापछि स्वदेश आउने भएकी छिन् ।

अमेरिकाको बोस्टनस्थित टफ्ट्स विश्वविद्यालयमा अन्तर्राष्ट्रिय सम्बन्धमा स्नातक तहको दोस्रो वर्षमा अध्ययनरत गौरिका असोज २७ गते नेपाल आइपुग्ने बेलायत बस्दै आएका उनका बाबु पारस सिंहले जानकारी दिएका छन् ।

‘गौरिका असोज २७ मा काठमाडौं आउने र नवौंका लागि पोखरा जाने योजना छ । हामी असोज २४ मै नेपाल पुग्नेछौं,’ सिंहले भने,‘ अध्ययनका कारण नवौं राष्ट्रिय खेलकुदमा प्रतिस्पर्धा गरे लगत्तै अमेरिका फर्कनुपर्नेछ ।’ गौरिकाले त्रिभुवन आर्मी क्लबबाट नवौं राष्ट्रिय खेलकुद खेल्नेछिन् ।’

नवौं असोज २८ देखि कात्तिक ३ सम्म गण्डकी प्रदेशमा हुनेछ । पौडीको प्रतिस्पर्धा असोज २९ देखि कात्तिक १ गते सम्मका लागि तय भएको छ । सिंहका अनुसार गौरिकाले नवौं राष्ट्रिय खेलकुदका लागि सामान्य तयारी गरेकी छिन् ।

‘अमेरिकामा पौडीको सिजन सुरु भएको छैन । त्यसले सामान्य तयारी गरेकी छिन्,’ उनले भने,‘अहिले उच्च फर्ममा सायद छैनन् होला ।’सागको एकै संस्करणमा सर्वाधिक स्वर्ण पदक जित्ने जित्ने खेलाडी हुन् । उनले ४ स्वर्ण पदकसहित १३ औं सागमा ९ पदक जितेकी थिइन् ।