पोखरा (हाम्रो खेलकुद) – आठौं राष्ट्रिय खेलकुदमा दिदी गौरिका सिंहले कीर्तिमानी १२ स्वर्ण पदक जित्दा भाइ सौरेन बहादुर सिंह ११ वर्षका थिए । त्यसबेला दिदी गौरिकाले आफूले जितेको सबै पदक भाइलाई लगाइदिएकी थिइन् ।

नवौं राष्ट्रिय खेलकुद अन्तर्गत पौडीको पहिलो दिन दक्षिण एसियाली खेलकुद (साग) की कीर्तिमानी पौडी खेलाडी गौरिका सिंहका भाई सौरेनबहादुर सिंहले पहिलो पटक राष्ट्रिय खेलकुदमा पदक जितेका छन् । नवौं राष्ट्रिय खेलकुदअन्तर्गत फिस्टेल एकेडेमीको पौडी पोखरामा पौडीको पहिलो दिन सौरेनले २ मिटर ब्याक स्ट्रोकमा कास्य पदक जितेका हुन् ।

एपिएफबाट खेलेका सौरेनले २ मिनेट २५.२३ सेकेन्डको समय निकाल्दै कास्य पदक जितेका थिए । सो इभेन्टमा एपिएफकै तेन्जिङ नाम्दो रायन गुरुङले स्वर्ण र प्रदेश १ का प्रारम्भ भण्डारीले रजत पदक जितेका थिए । रायनले २ मिनेट १६.२३ र प्रारम्भले समय २ मिनेट २३.६४ सेकेन्डको समय निकालेका थिए ।

सौरेन आमाबुवाका साथ बेलायत बस्दै आएका छन् भने पछिल्लो एक वर्षयता गौरिका अध्ययनका लागि अमेरिका बस्दै आएकी छिन् । सौरेनले आठौं राष्ट्रिय खेलकुदमा भाग लिएपनि पदक जित्न सकेका थिएनन् । सौरेनले नवौंमा २ सय मिटर इन्डिभिज्युल मेड्ली, २ सय मिट ब्रेकस्ट्रोक, ४ सय मिटर इन्डिभिजुयल मेड्ली र २ सय मिटर बटरफ्लाइमा प्रतिस्पर्धा गर्नेछन् ।

गौरिकाले भने अस्वस्थताका पहिलो दिनका आफ्नो दुई इभेन्टबाट नाम फिर्ता लिइन् । पौडीको पहिलो दिन गौरिकाले १ सय मिटर फ्रिस्टाइलको हिटमा भाग लिएकी थिइन् । उनी फाइनल राउन्डका लागि छनोट भएकी थिइन् । त्यसपछि स्वास्थ्य खराबपछि पनि उनलाई अस्पताल भर्ना गरिएको थियो । पेट दुखेर बान्ता भएपछि गौरिकालाई अस्पताल लगिएको उनका बुवा पारस सिंहले जानकारी दिएका छन् ।

११ इभेन्ट्समा भाग लिन आएकी गौरिकाले अब ९ वटा इभेन्ट्समा प्रतिस्पर्धा गर्न बाँकी रहेको छ । परिक्षणपछिको रिपोर्ट समान्य आएको आइतबार हुने ४ इभेन्ट्समा खेल्न सम्भावना रहेको बुवा पारसले जानकारी दिए । गौरिकाले आइतबारर ८ सय मिटर फ्रिस्टाइल, २ सय मिटर फ्रिस्टाइल, १ सय मिटर ब्याक स्ट्रोक र ४ गुण १ सय मिटरर रिलेमा प्रतिस्पर्धा गर्ने तालिका रहेको छ ।

त्रिभुवन आर्मी क्लबबाट सहभागी भइरहेकी गौरिकाले ५० ब्याक स्ट्रोक, ४ गुणा २ सय ब्याकस्ट्रोक, ४ मिटर फ्रिस्टाइल, ५० मिटर फ्रिस्टाइल र ४ गुणा १ सय मिक्स्ड फ्रि स्टाइलमा नाम दर्ता गराएकी छिन् । गौरिकाले तीन वर्ष अघि स्वदेशमा भएको १३ औं सागमा कीर्तिमान ४ स्वर्ण , २ रजत र ३ कास्यसहित ९ पदक जितेकी थिइन् ।