काठमाडौं (हाम्रो खेलकुद) – प्रथम प्याब्सन यू–१८ राष्ट्रिय महिला तथा पुरुष भलिबल प्रतियोगिताको उद्घाटन खेल सुर्खेत भलिबल संघ र एञ्जल्स हर्ट स्कुल बीच हुने भएको छ ।
शनिबार भएको टेक्निकल मिटिङमा रेफ्री संयोजक कुलबहादुर रानाले पुरुषतर्फको सुर्खेत भलिबल संघ र एञ्जल्स हर्ट स्कुल बीच उद्घाटन खेल हुने जानकारी गराएको हो । कात्तिक १९ गतेसम्म सञ्चालन हुने प्रतियोगितामा महिलातर्फ १६ र पुरुषतर्फ २३ विद्यायलको सहभागिता रहने छ ।
प्रतियोगिताको उद्घाटन युवा तथा खेलकुदमन्त्री राजेन्द्रकुमार केसीले गर्ने आयोजकले जनाएको छ ।
प्रतियोगितामा महिला तथा पुरुष दुवैलाई ८ समूहमा विभाजन गरिएको छ । हरेक समूहका विजेता र उपविजेता नकआउट चरणमा प्रवेश गर्नेछन् । प्रतियोगिताको सबै खेल नयाँ बसपार्कस्थित ढोरपाटन भलिबल प्रशिक्षण केन्द्रमा हुनेछ । प्रतियोगितामा जम्मा ५८ खेल हुने रेफ्री संयोजक कुलबहादुर रानाले जानकारी दिए । उनले लिगकम नकआउटका आधारमा हुने प्रतियोगिताको लिग चरणका खेल बेस्ट अफ थ्री र नकआउट चरणका खेल बेस्ट अफ फाइभमा हुने जानकारी दिए ।
प्रतियोगितालाई व्यवस्थित एवं सभ्य र भब्य रुपमा सञ्चालन गर्न निरोज मास्केको संयोजकत्वमा जुरी समिति, विद्यालय भलिबल कमिसनका अध्यक्ष रामबहादुर केसीको संयोजकत्वमा उत्कृष्ट खेलाडी छनोट समिति गठन गरिएको छ । प्रतियोगितामा उत्कृष्ट प्रदर्शन गर्ने २४ महिला र २४ पुरुष खेलाडी छनोट गरी यू–१८ को राष्ट्रिय टिम तयार पार्ने भएको छ । यू–१८ को राष्ट्रिय टोलीले चैतमा माल्दिभ्समा हुने प्रतियोगितामा सहभागी गराइने कमिसनका अध्यक्ष रामबहादुर केसीले जानकारी दिए ।
प्रतियोगिताको महिला तथा पुरुष विजेता टोलीले एकएक लाख रुपैयाँ प्राप्त गर्नेछन् । यस्तै दोस्रो हुनेले ६० हजार र तेस्रो हुने टोलीले ३५ हजार रुपैयाँ प्राप्त गर्नेछन् । यसैगरी प्रतियोगिताका उत्कृष्ट खेलाडीले पाँच हजार रुपैयाँ प्राप्त गर्नेछन् भने विधागत उत्कृष्टतर्फ बेस्ट स्पाइकर, सेटर, ब्लकर, सर्भर र डिफेन्सले तीन हजार रुपैयाँ प्राप्त गर्नेछन् ।
