काठमाडौं (हाम्रो खेलकुद) – नेपाल भलिबल संघले काभा बिच भलिबल प्रतियोगिताका पदक विजेता राष्ट्रिय महिला र पुरुष भलिबल टोलीलाई शुक्रबार नगदसहित सम्मान गरेको छ ।

गत वर्ष पुस १३ गते देखि १५ गते सम्म बंगलादेशको कक्स बजारमा सम्पन्न काभा बिचभलिबल प्रतियोगिताको महिला र पुरुष दुवै टोलीमा नेपालले रजत पदक जितेको थियो । महिला जोडीमा कोपिला उप्रेती र कमला पुन थिए । पुरुषतर्फ मानबहादुर श्रेष्ठ र दिल सुनार रहेका थिए ।

मानबहादुर यसै साता राष्ट्रिय भलिबल टोलीको कप्तान नियुक्त भएका थिए । दुबै टोलीको प्रशिक्षकमा भरत शाह र व्यवस्थापकमा जुनु पुन थिए । शाह राष्ट्रिय भलिबल टोलीका पूर्व कप्तान र पुन नेपाल भलिबल संघकी केन्द्रिय सदस्य हुन् ।

नक्सालस्थित होटल क्राउन प्लाजामा राष्ट्रिय खेलकुद परिषद् (राखेप) का उपाध्यक्ष शिव कोइरालाको मुख्य आतिथ्यतामा भएको कार्यक्रममा पदक विजेता खेलाडी, प्रशिक्षक र व्यवस्थापकलाई समान २५ हजार रुपैयाँसहित सम्मान गरिएको थियो ।

व्यवस्थापक पुनले भने आफूले प्राप्त गरेको रकमबाट केहि राष्ट्रिय भलिबल महिला र पुरुष टोलीलाई , केहि रकम भलिबलकी अन्तर्राष्ट्रिय रेफ्री चन्द्र बदना राईको उपचारका लागि र बाँकी रकम अनाथ बालबालिकाको स्टेशनरीमा खर्च गर्ने जानकारी दिइन् ।

नेपाल भलिबल संघका अध्यक्ष जीतेन्द्रबहादुर चन्दले १९ औं एसियाली खेलकुदमा नेपाली महिला र पुरुष दुबै टोलीलाई सहभागी गराउने राखेपको निर्णयको स्वागत गर्दै धन्यवाद दिएका थिए । उनले नव नियुक्त कप्तान मानबहादुरलाई सफल कार्यकालको शुभकामना पनि दिए ।