काठमाडौं (हाम्रो खेलकुद) – चीनको हान्जाउमा हुने १९ औं एसियाली खेलकुद (एसियाड) का लागि स्पाइकर प्रतिभा मालीले राष्ट्रिय महिला भलिबल टोलीमा पूनरागमन गरेकी छिन् । उनीसँगै काभा महिला च्यालेन्ज कपमा टोलीमा नरहेकी जानकी भण्डारी पनि राष्ट्रिय टोलीमा फर्किएकी छिन् ।

काभा च्यालेन्ज कपमा टोलीमा रहेका ४ खेलाडी भने एसियाड टोलीमा परेनन् । जसमा शान्तिकला तामाङ, पुजा चौधरी, रिमा कँुवर र प्रगति नाथ छन् । काभाको दौरान प्रतिभा नियमित फिजियो गराइरहेका कारण टोली थिइनन् । त्यसअघि उनको घँुडाको शल्यक्रिया गरिएको थियो । उनले असार ३० गते सम्म पिएम कप राष्ट्रिय क्लब लिग भलिबलमार्फत खेलमा पूनरागमन गरेकी थिइन् ।

काभामा रहेका १० खेलाडी भने एसियाड टोलीमा छन् । जसमा कप्तान अरुणा शाही, सरस्वती चौधरी, सलिना श्रेष्ठ, सफिया पुन, निरुता ठगुन्ना, उषा भण्डारी, संगम महतो, पुनम चन्द, कामना विष्ट र कविता भट्ट छन् । एसियाडका १२ सहित पुजा चौधरी पनि प्रशिक्षणमा भने सामेल छिन् ।

काभा च्यालेन्ज कपपछि स्वदेश फर्केका राष्ट्रिय भलिबल टोलीका मुख्य प्रशिक्षक यान डे ब्रान्ट नेपाल फर्केर प्रशिक्षणमा जुटिसकेका छन् ।

एसियाडका लागि महिला राष्ट्रिय भलिबल टोली

सेटर – अरुणा शाही र जानकी भण्डारी

मिडल ब्लकर – सफिया पुन, संगम महतो र कविता भट्ट

लिबेरो – सलिना श्रेष्ठ

स्पाइकर – सरस्वती चौधरी, प्रतिभा माली, निरुता ठगुन्ना, उषा भण्डारी, पुनम चन्द र कामना विष्ट