काठमाडौं, मंसिर २२ गते ।

‘अन्तर्राष्ट्रिय हाइ अल्टिच्युट स्पोर्टस् टेनिङ सेन्टर’ निर्माणार्थ आयोजित अन्तरक्रियामा राष्ट्रिय खेलकुद परिषद् (राखेप) का सदस्य–सचिव केशवकुमार विष्टले सेन्टर निर्माण कार्यलाई परिषद्ले आफ्नै कार्यक्रम मनेर अगाडि बढाउने प्रतिबद्धता व्यक्त गरेका छन् ।
फ्रेन्डसिप युथ क्लबको संयोजनमा सोलुखुम्बु जिल्ला खेलकुद विकास समितिद्वारा चौरीखर्क गाविसको लुक्लामा आयोजित अन्तरक्रियमा सदस्य–सचिव विष्टले सो प्रतिबद्धता व्यक्त गरेका हुन् ।

‘सेन्टर बनाउनका लागि परिषद्मा सोलुखुम्बु जिल्ला खेलकुद विकास समितिबाट निवेदन आओस् । त्यसैलाई आधार बनाएर हामी आफ्नै कार्यक्रम मानेर निर्माण कार्यलाई अगाडि बढाउने छौं ।’ सदस्य–सचिव विष्टले भने ।

सदस्य–सचिव विष्टको उपस्थितिमा मंगलबारै जिल्लाका सांसदद्वय बलबहादुर केसी र गोपाल गिरी, स्थानियबीच भएको छलफलमा स्थानिवासीले सहुलियत मुल्यमा आवश्यक जग्गा उपलब्ध गराउन सहमति जनाएका छन् । चौलीखर्क गाविसको बममा रहेको जग्गा उपलब्ध गराउने सहमति भएको हो ।

सहमति अनुसार सोलु जिखेविसले सेन्टर निर्माणका लागि पत्र पठाएपछि त्यसैको आधारमा परिषद्को बोर्ड बैठकमा सेन्टर लुक्लाको बममा बनाउने निर्णय गरिने सदस्य–सचिव विष्टले प्रतिबद्धता व्यक्त गरे । सांसद् केसीको नेतृत्वमा गठित समितिले सोलु जिखेविसको स्वामित्वमा रहने गरी जग्गा खरिद गर्नेछ । त्यही जग्गामा परिषद्ले सेन्टर निर्माण प्रक्रियालाई अगाडि बढाउने छ ।

सेन्टर निर्माणका लागि परिषद्ले २ वर्ष अगाडि राखेपका सदस्य शिव बस्नेतको संयोजकत्वमा समिति गठन गरेको थियो । उक्त समितिले जोमसोम, जिरी र लुक्लामा अध्ययन गरेपछि लुक्लाको बममा सेन्टर निर्माण गर्न उपयुक्त हुने ठहर गरेको थियो ।