विराटनगर (हाम्रो खेलकुद)– सातौं राष्ट्रिय खेलकुद अन्र्तगत एथलेटिक्सको महिला सटपुटमा नेपाल प्रहरी क्लबकी चन्द्रकला लामगादेले राष्ट्रिय कीर्तिमान बनाएकी छिन् । सुनसरीको इटहरी रंगशालामा शनिबार भएको महिला स्पर्धातर्फको सटपुटमा नेपाल प्रहरीकी चन्द्रकला लामगादेले आफ्नै नाममा रहेको कीर्तिमान भङ गर्दै नयाँ कीर्तिमान कायम गरेकी हुन् ।
चन्द्रकलाले ११ दशमल ५६ मिटर दुरी थ्रो फाल्दै नयाँ कीर्तिमान बनाएकी हुन् । यसअघि चन्द्रकलाको नाममा ११ दशमलब ४ मिटरको कीर्तिमान थियो । राष्ट्रिय कीर्तिमान बनाउनेलाई राष्ट्रिय खेलकुद परिषद् (राखेप)ले २५ हजार रुपैयाँबाट पुरस्कृत गर्ने यसअघि नै सार्वजनिक गरिसकेको छ ।
यसरी राष्ट्रिय कीर्तिमानमा नगदबाट पुरस्कृत गर्न लागिएको पहिलो पटक हो । यस्तै नेपाल आर्मीकी अमृता महतोले १० दशमलब १२ मिटर थ्रो फाल्दै रजत पदक जितिन भने नेपाल प्रहरीकी बसन्ती चौधरीले ९ दशमलब ७५ मिटर थ्रो फाल्दै कास्य हात पारिन् ।
