नेपालगन्ज (हाम्रो खेलकुद)- नेपालगन्ज १० किमी नाइट रनको उपाधि त्रिभुवन आर्मी क्लबका मुकेश पाल र बाँके नरैनापुरकी गीता साहुले जितेका छन् ।

धारा नेपालगन्ज म्याराथनकाे दशाैं संस्करण विशेष बनाउन ‘दशाैंमा दस इभेन्ट’ अन्तर्गत पहिलो कार्यक्रमका रुपमा भएको १० किलोमिटर रात्री दाैडमा महिला खुलातर्फ ५९ मिनेट १६:५२ सेकेन्ड पूरा गर्दै गीता पहिलो भएकी हुन् । काेहलपुरकी स्वस्तिका शाही ( ५१ मिनेट ०६:३७ सेकेन्ड) दोस्रो र सलिना थारु (१ घन्टा ६ मिनेट ४८ सेकेन्ड)तेस्रो भइन् ।

संविधान दिवसका अवसरमा बिहीवार राति नेपालगन्जमा भएको रात्री दाैडमा पालले ३१ मिनेटमा ०७.२१ सेकेन्ड पूरा गर्दै च्याम्पियन बनेका हुन् ।

एपिएफ क्लबका सन्तोष विक्रम बिष्ट दाेस्राे र किरणसिंह बाेगटी तेस्रो भए । सन्ताेषले ३२ मिनेट ४८:४४ सेकेन्ड र किरणले ३२ मिनेट ५४:६३ सेकेन्ड मा दाैड पूरा गरेका हुन्।

दुवैतर्फको विजेताले २५ हजार, दोस्रोले १५ हजार र तेस्रो ले १० हजार रुपैयाँ प्राप्त गरे । लुम्बिनी प्रदेश खेलकुद परिषदका सदस्यसचिव तिरनदाज गाैतम, केएल दुगड ग्रुपका सिईओ प्रदीप छाजेड, नेपालगन्ज म्याराथनका संरक्षक सदस्य केशरबहादुर आले, राखेप सदस्य दिपेन्द्र बिष्ट लगायतले पुरस्कृत गरे ।

रात्री दाैड जीवनमा पहिलोपटक दाैड्न पाउँदा नै आफू निकै लागेको विजेता महेशले बताएका छन् । ‘मैले उपाधि नै जितें, इतिहास बनाउने अवसर पाएँ ।’ उनले भने-‘रात्री दाैडकाे मज्जा नै बेग्लै हुने रहेछ ।’

पहिलोपटक ठूलो इभेन्टमा भाग लिएकी बाँके नरैनापुरकी गीताले आफुले नसाेचेकाे नतिजा प्राप्त गर्दा खुशी लागेको बताइन् । ‘पहिलोपटक यति धेरै पैसा जितेकी छु,’ उनलेे भनिन् -‘याे पैसा आमालाई दिन्छु, अब त अझै धेरै खेल्छु ।’

भेट्रान पुरुष तर्फ रैवत दाहाल (३८ मिनेट ०८:७१ सेकेन्ड) पहिलो, बाँके खजुराका भरत श्रेष्ठ (४८ मिनेट ५६:२३ सेकेन्ड ) दाेस्राे तथा महेन्द्र बज्राचार्य ( ४९ मिनेट १९:२५ सेकेन्ड ) तेस्राे भए ।

लुम्बिनीका पूर्व सदस्यसचिव भिम ओली, समाजसेवी लिलबहादुर थापाले भेट्रानलाई पुरस्कृत गरे । भेट्रान विजेता रैवतले पछिल्लो पुस्तालाई दाैडमा आकर्षित गरिरहन आफू दाैडिरहेकाे बराए । ‘राति दाैड्दा फरक अनुभुति हुने रहेछ,’उनलेे भने,’धेरैभन्दा धेरै दाैडमा भाग लिनुपर्छ, यसको आकर्षण बढ्दै जानेछ ।’

नेपालगन्ज उपमहानगरपालिका प्रवेशद्वार अगाडि निर्मित नाइट रन गेटबाट सुरु भएको दाैड विपीको चाेक, धम्बाेजी चाेक, पुष्पलाल चाेक, कारकादाे चाेक हुँदै राँझा नजिकै पुगेर पुन: साेही रुटमा विपी चाेक पुगेर दाैड सम्पन्न भएको थियोे ।

त्यसअघि नेपालगन्ज उपमहानगरपालिकाका मेयर प्रशान्त बिष्टले रात्रीकालिन दाैडकाे उद्घाटन गरेका थिए ।