काठमाडौं (हाम्रो खेलकुद)– ललितपुरको गोटीखेल जनहित क्लबले आफ्नो रजत महोत्सवको अवसरमा तीनवटा खेल आयोजना गर्ने भएको छ । चैत २६ गते देखि राष्ट्रव्यापी खुला पुरुष भलिबल प्रतियोगितासँगै बुद्धिचाल र दौड प्रतियोगिता पनि आयोजना गरिने शुक्रबार आयोजित पत्रकार सम्मेलनमा आयोजक क्लबका अध्यक्ष निरन्जन घिमिरेले बताए ।

भलिबलमा १२ देखि १४ टोलीसम्म भए नकआउट र त्यो भन्दा बढी भए नकआउटका आधारमा खेलाइने घिमिरेले जानकारी दिए । कुनै पनि टोलीले विभागिय टोलीका खेलाडीलाई भने समावेश गराउने नपाउने बताइएको छ । भलिबल प्रतियोगिताको विजेताले १ लाख, दोस्रो हुने टोलीले ५० हजार र सेमिफाइनलमा पराजित हुने दुई टोलीले समान २५ हजार रुपैयाँ पाउनेछन् ।

पुरुष र महिला सहभागी हुने बुद्धिचालमा समग्र विजेताले १० हजार, दोस्रो हुनेले ५ हजार र तेस्रो हुनेले २ हजार ५ सय रुपैयाँ प्राप्त गर्नेछन् । त्यस्तै महाँकाल गाउँपालिकाका स्थानियलाई लक्षित गरी आयोजना गर्न लागिएको ६ किलोमिटर दौडको पुरुष/महिलाको आ–आफ्नो समूहमा प्रथम हुनेले १० हजार, दोस्रो हुनेले ५ हजार र तेस्रोहुनेले २ हजार ५ सय रुपैयाँ प्राप्त गर्नेछ ।