काठमाडौं (हाम्रो खेलकुद) – टाइम्स इन्टरनेशनल कलेज क्विक्स नेपाल बास्केटबल लिग (एनबीएल) को फाइनलमा प्रवेश गरेको छ । बिहीबार भएको दोस्रो क्वालिफायरको दोश्र खेलमा नेपाल पुलिस क्लबलाई ७२-५४ ले पराजित गर्दै टाइम्स फाइनल प्रवेश गरेको हो ।
पहिलो क्वाटरमा पुलिसले १४-१३ को अग्रता लिएपनि दोस्रो क्वाटरमा पुलिसले अपेक्षित प्रदर्शन गर्न सकेन । दोस्रो क्वाटरको समाप्तिमा पुलिस ३०-२१ ले पछि परेको थियो । तेस्रो क्वाटरमा दुवै टोलीले २४-२४ स्कोर गरेपछि टाइम्सले अग्रता कायम राख्यो । अन्तिम क्वाटरमा टाइम्सले आफ्नो लयलाई कायम राख्दै जित पक्का गर्यो ।
टाइम्सको जितमा कप्तान सदिश प्रधानले उत्कृष्ट प्रदर्शन गरे । सदिश एक्लैले २५ अंक जोडेका थिए । उनले खेलको तेस्रो क्वाटरमा उत्कृष्ट प्रदर्शन गरेपछि टाइम्स जिततर्फ उन्मुख भएको थियो । टाइम्सले अब शनिबार हुने उपाधि भिडन्तमा आर्मीको सामना गर्नेछ ।
प्रतियोगिताको विजेताले दुई लाख रुपैयाँ र उपविजेताले एक लाख रुपैयाँ प्राप्त गर्नेछन् । प्रतियोगिताका मोस्ट भ्यालुएबल प्लेयर र हाइएस्ट स्कोररका लागि पनि उचित पुरस्कारको ब्यवस्था गरिएको आयोजकले जनाएको छ ।
