काठमाडौं (हाम्रो खेलकुद) – मंगलबारदेखि सुरु हुने वाई वाई यू-१९ पुरुष राष्ट्रिय क्रिकेट प्रतियोगिता सम्पूर्ण तयारी पूरा भएको छ । नेपाल क्रिकेट संघ (क्यान) ले सोमबार एक पत्रकार सम्मेलनका साथ सम्पूर्ण तयारी पूरा भएको जनाएको छ ।

प्रतियोगितामा ७ प्रदेशका ७ टोलीबीच प्रतिस्पर्धा हुनेछ । एकदिवसिय शैलीको प्रतियोगितामा लिगको आधारमा प्रतिस्पर्धा हुनेछ । लिगका खेलहरु मंसिर १७ सम्म टियु र उपल्लो मुलपानी क्रिकेट मैदानमा हुनेछन् । हरेक टोलीले एक अर्कासँग खेलेपछि शीर्ष दुई टोलीले मंसिर १९ मा फाइनलमा प्रतिस्पर्धा गर्नेछन् ।

अर्को महिना हुने यू१९ एसिया कपको लागि खेलाडी छनोट गर्न क्यानले यू१९ पुरुष राष्ट्रिय प्रतियोगिता आयोजना गरेको हो । क्यानका म्यानेजर विनोद दासले यू१९ एसिया कप डिसेम्बर अन्तिममा हुने भनिएपनि पक्का भने नभएको बताएका छन् । क्यानले पुरस्कार भन्दापनि खेलाडीलाई धेरै अवसर दिने जनाएको छ ।

प्रतियोगिता आयोजनाको लागि झन्डै ९३ लाख खर्च लाग्ने क्यानले जनाएको छ । जसमा चौधरी ग्रुपको उत्पादन वाई वाईले ७० लाख रुपैयाँ पैदान गर्ने छ । क्यानले यू१९ क्रिकेटको लागि गत चैतमा वार्षिक ७० लाखको रुपमा पाँच वर्षको लागि वाई वाईसँग सम्झौता गरेको थियो । टियुमा हुने सम्पूर्ण खेलको प्रत्यक्ष प्रसारण डिस होम मिडिया नेटवर्कको एक्सन स्पोर्ट्सले गर्नेछ । क्यानका कार्यवहाक सचिव प्रशान्त मल्लले यू१९ राष्ट्रिय प्रतियोगिता विना सिनियर टोलीले सोचेको उचाई लिन नसक्ने बताएका थिए ।

‘सिनियर टोलीको बेन्च स्ट्रेन्थ र ग्रास रुट बलियो बनाउन यू१९को ठूलो भूमिका र महत्व हुन्छ । हामी खेलाडीलाई धेरै भन्दा धेरै अवसर दिन चाहन्छौं । पुरस्कार भन्दा पनि हाम्रो ध्यान खेलाडीको अवसरमा बढी छ’ , म्यानेजर विनोद दासले भने ।

झण्डै ८ वर्षपछि यू१९ राष्ट्रिय प्रतियोगिता आयोजना हुन लागेको हो । क्यान राजनीति, निलम्बन र कोरोना महामारीको कारण लामो समय देखि यू१९ राष्ट्रिय प्रतियोगिता आयोजना हुन सकेको थिएन । उद्धघाटन खेलमा मंगलबार टियु मैदानमा प्रदेश नम्बर १ र बागमती प्रदेशबीच प्रतिस्पर्धा हुनेछ । मंगलबारनै मुलपानीमा गण्डकी प्रदेश र लुम्बनी प्रदेशबीच प्रतिस्पर्धा हुनेछ ।

यो पनि पढ्नुहोस् : ट्यालेन्ट हन्टमै निर्भर घरेलु क्रिकेट

नेपाली यू१९ टोलीको सम्भावित ६ प्रशिक्षक