भुपेन्द्र जिसी, काठमाडौं

घरेलु टोली ओमान आइसिसी टि२० विश्वकप ग्लोबल छनोट ए को बलियो टोली हो । स्तरमात्र होईन घरेलु मैदान र वातावरणले झन् ओमानको सम्भावना थप बलियो बनेको छ । ओमान घरेलु मैदानको भरपूर्ण फाइदा उठाउँदै अक्टोबर नोभेम्बरमा अष्ट्रेलियामा हुने टि२० विश्वकप खेल्न चाहन्छ । फेब्रुअरी १८ देखि ग्लोबल छनोट ए मा आयरल्यान्ड, नेपाल, ओमान, युएई, जमर्नी, बहराईन, क्यानडा र फिलिपिन्स छन् ।

यस अन्तर्गत नेपाल, ओमान, क्यानडा र फिलिपिन्स समूह बी मा छन् । समूह ए मा आयरल्यान्ड, बहराइन, जमर्नी र युएई छन् । दुवै समूहको शीर्ष दुई टोली सेमिफाइनलमा पुग्नेछन् । आयरल्यान्ड, ओमान, नेपाल र युएई प्रमुख दाबेदार हुन् । क्यानडा सबैलाई सरप्राइज दिँदै विश्वकपमा पुग्ने सोचमा छ ।

ओमान र नेपालबीच उद्धघाटन खेल फेब्रुअरी १८ मा हुनेछ । यस खेलको नतिजाले सेमिफाइनल समिकरणमा ठूलो प्रभाव पार्नसक्छ । ओमान र नेपालबीचको विजेता समूहको शीर्ष स्थानमा रहँदै सेमिफाइनल खेल्ने सम्भावना बलियो हुन्छ । कुनै अप्रत्याशित नतिजा नआएमा समूह ए मा आयरल्यान्ड शीर्ष र युएई दोस्रो स्थानमा रहँदै सेमिफाइनल खेल्ने सम्भावना छ । समूह बी को विजेताले टेस्ट टोली आयरल्यान्डको सामना गर्नुपर्ने छैन । जुन मनोवैज्ञानिक रुपमा थप फाइदा पुग्नसक्छ ।

पाकिस्तान र भारतीय मुलका खेलाडीको बाहुल्यता रहेको ओमानले एसोसिएट क्रिकेटमा उच्च प्रदर्शन गर्दै आएको छ । नेपालसँग खेलमा ओमान लगातार हाबी हुँदै आएको छ । ओमानसँग नतिजाले नेपालको विश्वकप भविष्य निर्धारण गर्नसक्छ । तर नेपालले ओमानलाई हराउन उसको कमजोरीको भने फाइदा उठाउनु पर्छ । नेपालले ओमानको यी चार कमजोरीको फाइदा उठाउन सके सहज जितका साथ विश्वकप यात्रामा सानदार सुरुवात गर्नसक्छ ।

४. बिलालमा आश्रित तीव्र गतिको आक्रामण

बायाँ हाते तीव्र गतिका बलर बिलाल खान ओमानका प्रमुख तीव्र गतिका बलर हुन् । ओमानको तीव्र गतिको बलिङ युनिट बिलालमा धेरै आश्रित छ । बिलाल, कलिमुल्लाह, मोहम्मद नदीम र फय्जाज बट ओमानको तीव्र गतिको बलर हुन् । ओमानबाट टि२० आईमा बिलाल ३८ खेलमा ५६ विकेटका साथ शीर्ष स्थानमा छन् ।

नदिम २८ खेलमा २४ विकेटका साथ चौथो स्थानमा छन् । उनी अलराउन्डरको रुपमा खेल्ने गर्दछन् । बटले १६ खेलमा १४, कलिमुल्लाहले १० खेलमा ७ विकेट लिएका छन् । अक्टोबरमा घरेलु मैदानमा भएको टि२० विश्वकपमा ओमान स्कटल्यान्डसँग ८ विकेटले पराजित भएको थियो । उक्त खेलमा विलाल विकेटविहीन थिए ।

२०२० फेब्रुअरीमा ओमान कतारसँग ३४ रनले पराजित भएको थियो । कतारले पहिला ब्याटिङ गर्दै २० ओभरमा ५ विकेट गुमाउँदै १ सय ७४ रन बनाएको थियो । विलाल खानले १ विकेट मात्र लिएका थिए । जुन खेलमा बिलालले राम्रो सुरुवात दिलाएका छन् त्यसमा अन्य तीव्र गतिका बलरले पनि राम्रो गरेका छन् ।

बिलाल बाहेक अन्य तीव्र गतिका बलरमा खास गति छैन । म्याचलाई पूरै बदल्न सक्ने खुबी बिलाल बाहेक अन्य तीव्र गतिका बलरमा कमै देखिन्छ । बिलालमाथि नै आक्रामक क्रिकेट खेल्न सके नेपाल झन् हाबी हुनसक्छ । अन्यथा बिलालबाट सचेत हुँदै आक्रामक क्रिकेट खेल्न सक्नुपर्छ ।

३. ब्याटिङ शीर्ष चार ब्याटरमा निर्भर

ओमानको ब्याटिङ शीर्ष चार ब्याटरमा निर्भर छ । अर्थात ओमानको ब्याटिङमा गहिराई पाइदैन । शीर्ष चार ब्याट नचलेको खेलमा ओमान कमै मात्रमा विजयी भएको छ । ओमानको टि२० आई इतिहासमा २ सयमाथि ७ खेलाडीले रन बनाएका छन् । ती सबै शीर्ष चारका ब्याटर हुन् ।

ओमानबाट टि२० आईमा १३ अर्धशतक प्रहार भएका छन् । जसमा ओपनर जतिन्दर सिंहले ४, अकिब इलियासले ३,जिशान मकसुद र खवर अलीले २–२ अर्धशतक प्रहार भएका छन् । सबै अर्धशतक शीर्ष चारबाटनै आएको छ । ओमानले २०२१ मा कतार र २०१९ मा जर्सीसँग हार्नुको मुख्य कारण पनि शीर्षक्रम नचल्नु हो । पावर प्लेमा शीर्षक्रमका ब्याटरको विकेट लिन सके नेपालको जित सहज हुने देखिन्छ । ओमानको ब्याटिङ शीर्ष चारमा बढी निर्भर रहँदै आएको छ ।

२. कप्तानमा बढी भरोसा

ओमान क्रिकेट टोली कप्तान जिशान मकसुदमा बढी निर्भर छ । ब्याटिङ र बलिङ दुबैमा ओमान मकसुद प्रमुख खेलाडी हुन् । टि२० आईमा ओमानबाट सर्वाधिक रन बनाउनेमा मकसुद ३४ खेलमा ५ सय ९३ रनका साथ तेस्रो स्थानमा छन् ।

विकेट लिनेतर्फ मकसुद २३ विकेटका साथ पाँचौं स्थानमा छन् । मकसुदले चौथो नम्बरमा ब्याटिङ गर्दै परिपक्क प्रदर्शन गर्दै आएका छन् । ओमानका प्रमुख स्पिनर हुन् । मकसुद २०२१ को एसोसिएट क्रिकेटर अफ द इअर समेत चुनिएका थिए । मकसुदको कमजोर प्रदर्शन विना ओमानको जित कठिन देखिन्छ । नेपालले पनि यसको फाइदा उठाउनुपर्छ ।

१. कमजोर मध्यक्रम र तल्लोक्रम ब्याटिङ

ओमानको मुख्य कमजोरीनै मध्यक्रम र तल्लोक्रम ब्याटिङ हो । कमजोर मध्यक्रम ओमानको सबैभन्दा ठूलो टाउको दुखाईको विषय बन्दै आएको छ । ओमान टि२० विश्वकपमा स्कटल्यान्डसँग १ सय २२ रनमा अल आउट भयो । मध्यक्रम र तल्लोक्रमका गरि कुल ७ ब्याटरले ५३ रन मात्र बनाएका थिए ।

जिशान मकसुदले एक्लै ३४ रन र बाँकी ६ खेलाडीले १९ रन जोडेका थिए । बंगलदेशसँग १ सय २७ रनमा अल आउट भएको थियो । शीर्षक्रमका चार ब्याटरले ७९ रन जोड्दा बाँकी ७ ब्याटरले ३६ रन मात्र बनाएका थिए । यी उदाहरण मात्र हुन् ।

शीर्ष चार ब्याटर नचलेका प्राय खेलमा ओमान पराजित भएको छ । ओमान २०२० मा वस्टर्न रिजनमा कतारसँग ३४ रनले पराजित भयो । शीर्ष तीन ब्याटरले कुल ८५ रन बनाउँदा बाँकी ८ खेलाडीले मात्र ५४ रन बनाउन सके । २०१९ को टि२० विश्वकप छनोटमा ओमान जर्सीले प्रस्तुत गरेको १ सय ४२ रनको विजयी लक्ष्य पछ्याउनेक्रममा ९ विकेट गुमाउँदै १ सय २७ रनमा समेटिएको थियो ।

मध्यक्रम र तल्लोक्रम ओमानको सबैभन्दा ठूलो चिन्ताको विषय हो । टि२० क्रिकेटमा मध्यक्रम र तल्लोक्रमका ब्याटरको प्रदर्शन अहम हुन्छ । तर ओमानको टोलीमा भने त्यसो देखिदैन । शीर्षक्रम सस्तैमा आउट हुँदा सस्तैमा समेटिने सम्भावना बढी रहन्छ ।

यो पनि पढ्नुहोस् : टि२० विश्वकप छनोटमा नेपालका पाँच प्रमुख कमजोरी