मस्कट (हाम्रो खेलकुद) – नेपालले चार देश सम्मिलित टि२० आई सिरिजमा ओमानविरुद्ध नेपालले उत्कृष्ट सुरुवात गरेको छ । टस जितेर फिल्डिङ रोजेको नेपालले सुरुवाती चार ओभरमा ओमानका प्रमुख दुई ब्याटरलाई आउट गरेको छ ।

तीव्र गतिका बलर अभिनाश बोहराले तेस्रो ओभरको अन्तिम बलमा ओपनर कश्याप प्रजापतिलाई ११ रनमा बोल्ड आउट गरे । उनले ११ बलमा २ चौका प्रहार गरे । पहिलो विकेटका लागि कश्याप र जतिन्दर सिंहले २४ रनको साझेदारी गरेका थिए ।

चौथो ओभरको पहिलो बलमा आरिफ शेखले जतिन्दर सिंहलाई १३ रनमा विकेटकिपर आसिफ शेखबाट क्याच गराए । जतिन्दर ८ बलमा ३ चौका प्रहार गरे । आरिफको बलमा जतिन्दर टप एज लागेर कट विहाइन्ड हुन पुगेका थिए । जतिन्दरको विकेटसँगै नेपाल खेलमा हाबी बनेको छ ।

डेब्यूको पहिलो दोस्रो ओभरमै बलिङ गर्न आएका स्पिनर सागर ढकालले तीन चौकासहित १२ रन खर्चेका थिए । ओमानले ३.१ ओभरमा २ विकेट गुमाएर २४ रन बनाएको छ ।

नेपालले आजको खेलमा युवा ओपनर कुशल भुर्तेल, करण केसी, कुशल मल्ल, लोकेश बम, साहब आलम र जितेन्द्र मुखियालाई बेन्चमा राखेको छ । 

नेपालको प्लेइङ ११ :

सन्दीप लामिछाने (कप्तान), आसिफ शेख, दीपेन्द्रसिंह ऐरी, ज्ञानेन्द्र मल्ल, शरद भेषावकर, आरिफ शेख, अभिनाश बोहरा, कमलसिंह ऐरी, विवेक यादव, सागर ढकाल र प्रदीप ऐरी ।