काठमाडौं(हाम्रो खेलकुद) – धनगढी मेयर लिटल फ्लावर प्रिमियर लिग–६ अन्तर्गत सोमबार दुई खेलमा शारदा सरस्वती दोधारा र हिमालयन ह्वाइट हाउस स्कुल काठमाडौं विजयी भएका छन् ।

दिनको पहिले खेलमा एभरेस्ट एकेडेमी अत्तरियालाई ३३ रनले पराजित गर्दै कञ्चनपुरको शारदा सरस्वती दोधारा पहिलो जित निकाल्न सफल भयो ।

टस हारेर ब्याटिङको निम्तो पाएको शारदाले निर्धारित २० ओभरमा ९ विकेट गुमाएर १ सय ३३ रन बनायो । जवाफी ब्याटिङ थालेको एभरेस्ट एकेडेमीले १९.३ ओभरमा १ सय रनमा अल आउट भयो । एभरेस्टका लागि योगेश भाटले २७ र सन्दीप विष्टले १९ रन बनाउनु अन्यले राम्रो योगदान दिन सकेनन् ।

शारदाका अर्जुन सिंह साउदले ४ ओभरमा १४ रन खर्चेर ४ विकेट लिए। मिलन बोहराले २, विकास सुनार, हेमन्त धामी र राजेश साउदले समान १र१ विकेट लिए ।

त्यसअघि शारदाका लागि हेमन्त धामीले २५ बलमा २ छक्का र ३ चौकासहित अविजित ३८ रनको पारी खेल्दा अनुराग सिंह २२ बलमा २३ रन बनाएर आउट भए । गणेश बिटालु र मिलन बोहराले टिमका लागि समान १४ र सुनिल चन्दले १३ रन बनाए ।

एभरेष्टका कृश ऐरले ४ ओभरमा ३ महत्त्वपूर्ण विकेट लिँदै ११ रन दिए । आकाश चन्द र धर्म जोशीले समान २र२ विकेट लिए । गोविन्द विष्ट र मुकेश ओझा १÷१ विकेट हात पारे ।

दोस्रो खेलमा हिमालयन ह्वाइट हाउस स्कुलले लगातार तेस्रो जित दर्ता गर्यो । सैनिक आवासीय महाविद्यालय तेघरीलाई ९२ रनले पराजित गर्दै हिमालयनले शानदार जित दर्ता गरेको हो ।

टस हारेर ब्याटिङको निम्तो पाएको हिमालयन ह्वाइट हाउस स्कुलले निर्धारित २० ओभरमा ७ विकेटको क्षतिमा २ सय ६ रन बनायो ।

२ सय ७ रनको विजयी पछ्यएको सैनिकले १५.३ ओभरमामा १ सय १४ रनमा अल आउट भयो । सैनिकका लागि सुरुवाती ब्याट्सम्यान खडक बोहरा र प्रज्वल थापाले ३.४ ओभरमै ३८ रनको साझेदारी गर्दै राम्रो सुरुवाती दिलाएका थिए । त्यसपछि सम्हालिन नसकेको सैनिकका ब्याट्सम्यानको प्रदर्शनले लगातार तेस्रो हार ब्यहोर्नुपर्यो । उसका लागि प्रज्वल थापाले ३६, खडक बोहराले २२, कमलेश विष्टले १३ र सागर चन्दले ११ रन मात्रै बनाउन सके ।

हिमालयनका दीपक बोहरा(जुनियर)ले ४ ओभर बलिङ गर्दै १ मेडनसहित २० रन दिएर महत्त्वपूर्ण ५ विकेट लिए । अनुप कुँवरले ४ र सन्दीप शाहीले १ विकेट लिए ।

यस अघि हिमालयनका लागि कप्तान नारायण जोशीले ११ छक्का र ४ चौकाको मद्दतले ३२ बलमै ९२ रनको उत्कृष्ट पारी खेले । उनलाई इनिङको अन्तिम ओभरमा कमलेस विष्टले बोल्ड आउट गरेका थिए । हिमालयनका वसन्त सिंह कार्कीले २९ बलमा ४७, लक्की कडायत र एमएस थापाले समान १६-१६, दीपक बोहराले १२ रन बनाएर आउट हुँदा रजत तिमिल्सिना १० रनमा नट आउट रहे ।

बलिङ तर्फ सैनिकका गौतम केसीले २, कमलेस विष्ट, सैलेश बम, सागर चन्द, खडक बोहरा र आकाश चन्दले समान १र१ विकेट लिए ।

खेलको प्लेयर आफ दी म्याच नारायण जोशी घोषित हुँदा सर्वाधिक छक्काको अवार्ड पनि उनैले पाए । गेम चेन्जर अवार्ड दीपक बोहरा जुनियरले पाए ।

प्रतियोगिता अन्तरगत भोलि मङ्गलवार पहिलो खेलमा बिहान ९ः३० बजे लिटल फ्लावर र गुरुकुल आमनेसामने हुनेछन्, भने दोस्रो खेलमा दिउसो १ः३० बजे विद्या भूषण र स्टेपिङ स्टोन भिड्नेछन् ।

धनगढी मेयर लिटल फ्लावर प्रिमियर लिगको विजेताले १ लाख ५० र उप–विजेताले ७५ हजार प्राप्त गर्नेछन् ।