एजेन्सी – पाकिस्तान सुपर लिग (पिएसएल) २०२२ को उपाधि लाहोर कलन्दर्सले जितेको छ । लाहोर कलन्दर्सले फाइनलमा मुल्तान सुल्तान्सलाई ४२ रनले हराउँदै पहिलो पटक पिएसएलको उपाधि जितेको हो ।

१ सय ८१ रनको विजयी लक्ष्य पछ्याएको सुल्तान्स १९.३ ओभरमा १ सय ३८ रनमा अल आउट भयो । मध्यक्रमका खुसदिल शाहले २३ बलमा ४ चौका र १ छक्कासहित सर्वाधिक ३२ रन बनाए । टिम डेविड २७, राइली रोसोउ १५ र कप्तान मोहम्मद रिजवान १४ रनमा आउट भए ।
कप्तान शाहिन शाह अफ्रिदीले ४ ओभरमा ३० रन खर्चेर ३ विकेट लिए । मोहम्मद हफिज र जमान खानले २–२ विकेट लिए । हरिस रौफ र डविड विसेले १–१ विकेट लिए ।

त्यसअघि गद्दाफी स्टेडियममा टस जितेर ब्याटिङ रोजेको घरेलु टोली लाहोरले निर्धारित २० ओभरमा ५ विकेट गुमाउँदै १ सय ८० रन बनायो । मोहम्मद हफिजले ४६ बलमा ९ चौका र १ छक्कासहित सर्वाधिक ६९ रनको योगदान दिए । ह्यारी ब्रुक्क २२ बलमा २ चौका र ३ छक्कासहित ४१ रनमा अविजित रहे । डेविड विसे ८ बलमा १ चौका र ३ छक्कासहित २८ रनमा अविजित रहे । सुल्तान्सका आसिफ अफ्रिदीले ४ ओभरमा १९ रन खर्चेर ३ विकेट लिए ।

पाकिस्तानका ओपनर तथा विकेटकिपर रिजवानले तीन ब्यक्तिगत अवार्ड जित्न सफल भए । प्रतियोगिताभर उत्कृष्ट प्रदर्शन गरेका रिजवानले १२ खेलमा ७ अर्धशतक सहित ५ सय ४६ रन बनाउँदै प्लेयर अफ द टुनामेन्ट, उत्कृष्ट विकेटकिपर र स्प्रिट अफ क्रिकेट अवार्ड जिते ।

लाहोरका ओपनर फखार जमान प्रतियोगिता सर्वोत्कृष्ट ब्याटर चुनिए । उनले १२ खेलमा १ शतक र ७ अर्धशतक सहित ५ सय ८८ रन बनाएका थिए । सुल्तान्सका खुसदिल शाहले उत्कृष्ट अलराउन्डर र फिल्डरको अवार्ड जिते । ईस्लामबाद युनाइटेडका स्पिनर सादब खान १९ विकेटका साथ उत्कृष्ट बलर चुनिए । १८ विकेट लिएका जमान खान इमर्जिङ प्लेयर चुनिए ।