काठमाडौं(हाम्रो खेलकुद) – पाँच पोखरी टि२० जिल्ला स्तरिय क्रिकेट प्रतियोगिता दोस्रो दिन चौतारा साँगाचोकगढी नगरपालिका र सानु सिरुवारीले विजयी सुरुवात गरेका छन् ।

मुलपानी क्रिकेट मैदानमा जारी खेलमा सिरुवारीले इन्द्रावती गाउँपालिकालाई ११ रनले हरायो । टस जितेर पहिला ब्याटिङ थालेको सिरुवारी १५.१ ओभरमा ७८ रनमा अल आउट भएको थियो । सिरुवारीको लागि रिन्जिन लामाले २७ बलमा ४ चौकासहित सर्वाधिक २६ रन बनाए । उमंग धितालले ९, मनोज देउजा ११ र रोशन श्रेष्ठ ९ रनमा आउट भए । इन्द्रावतीका सबिन कार्कीले ३.१ ओभरमा १ मेडनसहित ११ रन खर्चेर ४ विकेट लिए । राजेश र कपिल चौलागाईंले २-२ विकेट लिए ।

७९ रनको लक्ष्य पछ्याएको इन्द्रावती १८.३ ओभरमा ६७ रनमा अल आउट भयो । इन्द्रावतीका प्रकाश सापकोटाले ४३ बलमा सर्वाधिक १२ रन बनाए । प्रदीप सापकोटा ८, अरुण चौलागाईं ७ र विवेक सापकोटा ५ रनमा आउट भए । सिरुवारीका सुशान चौलागाईंले ३, रोशन श्रेष्ठ र सुदीप दुलालले २-२ विकेट लिए ।

अर्को खेलमा चौतारा साँगाचोकगढी नगरपालिकाले इन्द्रावती गाउँपालिकालाई ७४ रनले पराजित गर्यो । टस हारेर ब्याटिङको निम्तो पाएको साँगाचोकगढीले २० ओभरमा ६ विकेट गुमाउँदै १ सय ६६ रन बनाएको थियो । ओपनर नवराज थापाले ६७ बलमा ११ चौका र १ छक्कासहित १ सय २ रनको शतकीय इनिङ खेले । इन्द्रावतीका कमल प्रसाद लम्सालले २ विकेट लिए ।

१ सय ६७ रनको विजयी लक्ष्य पछ्याएको इन्द्रावती १६.५ ओभरमा ९२ रनमा अल आउट भयो । उसका लागि विनोद तामाङ २३ र अमृत लम्सालले १२ रन बनाए । मिलन थापाले सर्वाधिक ३ विकेट लिए । नवराज थापा, निर्मल थापा र विनोद गौतमले २-२ विकेट लिए ।