एजेन्सी – तीव्र गतिका बलर बिलाल खानको घातक बलिङको सहयोगमा ओमानले आइसिसी विश्वकप लिग–२ मा घरेलु टोली युएईलाई १२ रनले पराजित गरेको छ ।

आइसिसी एकेडेमी दुबईमा टस हारेर ब्याटिङ थालेको ओमानले निर्धारित ५० ओभरमा ७ विकेट गुमाउँदै २ सय २५ रन बनाएको थियो । ओमानका शोएब खानले ८९ बलमा ३ चौकासहित सर्वाधिक ६१ रन बनाए । अयान खान ३९, कप्तान जिशान मकसुद ३५, सन्दीप गौड २२ र जतिन्दर सिंह १९ रनमा आउट भए । युएईका जहुर खानले १० ओभरमा ५५ रन खर्चेर ३ विकेट लिए । रोहन मुस्तफाले २, बासिल हामिद र जुनैद सिद्दिकले १–१ विकेट लिए ।

२ सय २६ रनको विजयी लक्ष्य पछ्याएको युएई ४८.५ ओभरमा २ सय १३ रनमा अल आउट भयो । उच्च लयमा रहेका युवा विकेटकिपर वृत्य अरविन्द ६५ बलमा ५ चौकासहित सर्वाधिक ४४ रन बनाए । बासिल हामिद ३२, रोहन मुस्तफा २५, आसिफ खान २२, सिपी रिजवान २१, चिराग सुरी १२ र अहमद राजा ३१ रनमा आउट भए ।

ओमानका बिलाल खानले ९.५ ओभरमा १ मेडन राखेर ३१ रन खर्चिदै ५ विकेट लिए । कलिमुल्लाहले २, मोहम्मद नदिम, खवर अली र अयान खान १–१ विकेट लिए ।

युएई, ओमान र नामिबियाबीच त्रिकोणात्मक ओडिआई सिरिज हुनेछ । यस सिरिज पछि विश्वकप लिग २ अन्तर्गत नेपाल, युएई र पपुवा न्युगिनीबीच त्रिकोणात्मक ओडिआई सिरिज हुनेछ । नेपालले मार्च १६ मा पपुवा न्युगिनीसँग खेल्दै सुरुवात गर्नेछ । ७ देशबीच २०२३ सम्म चल्ने यस प्रतियोगितामा शीर्ष तीन टोलीले सिधैं एकदिवसिय विश्वकप ग्लोबल छनोट खेल्न पाउनेछन् ।

अंक तालिका

ओमान २४ खेलमा १५ खेलमा जित र ७ मा हार सहित ३२ अंक जोड्दै शीर्षस्थानमा छ । स्कटल्यान्ड १२ खेलमा ७ मा जित र ३ मा हार सहित १६ अंकका साथ दोस्रो स्थानमा छ । अमेरिका १६ खेलमा ७ मा जित र ९ मा हार सहित तेस्रो स्थानमा छ ।

युएई ११ खेलमा ५ मा जित र ४ मा हारसहित १२ अंकका साथ चौथो स्थाानमा छ । नामिबिया ९ खेलमा १० अंकका साथ पाँचौं स्थानमा छ । नेपाल ८ खेलमा ४ मा जित र ४ मा हारसहित ८ अंकका साथ छैटौं स्थानमा छ । पपुवा न्युगिनी १२ खेलमा १२ मानै हारका साथ पुछारमा छ ।