एजेन्सी – कप्तान गेरहार्ड इरास्मसको उत्कृष्ट कप्तानी शतकीय अविजित इनिङको सहयोगमा नामिबियाले आइसिसी विश्वकप लिग–२ मा ओमानलाई १ सय १० रनको फराकिलो जित हात पारेको हो ।

आइसिसी एकेडेमी दुबईमा टस जितेर पहिला ब्याटिङ थालेको नामिबिया ४९.५ ओभरमा २ सय २६ रनमा अल आउट भयो । कप्तान गेहरार्ड इरास्मसले १ सय २१ बलमा ९ चौका र ३ छक्कासहित १ सय २१ रनको अविजित शतकीय इनिङ खेले । ओडिआईमा उनको यो पहिलो शतक हो । नामिबियाबाट ओडिआईमा शतक प्रहार गर्ने तेस्रो खेलाडी हुन् ।

एक समय नामिबिया ३० ओभरमा १०३–८ को दयनिय अवस्थामा पुगेको थियो । तर इरास्मस र बर्नार्ड शोल्ट्ज़ले नवौं विकेटका लागि १ सय २१ रनको उत्कृष्ट शतकीय विजयी साझेदारी गरे । ओडिआई इतिहासमा नवौं विकेटका लागि भएको यो तेस्रो ठूलो साझेदारी हो । नवौं विकेटका लागि सर्वाधिक ठूलो साझेदारी सन् २०१० मा श्रीलंकाका एन्जिलो म्याथ्युज र लासिथ मलिङ्गाले अष्ट्रेलियाविरुद्ध मेलबर्न क्रिकेट मैदानमा १ सय ३२ रनको गरेका थिए ।

नामिबियाबाट ओडिआईमा दोस्रो ठूलो साझेदारी हो । यसअघि इरास्मस र जेपि कोट्जेबीच तेस्रो विकेटका लागि २०१९ मा सर्वाधिक १ सय २४ रनको साझेदारी भएको थियो । बर्नार्ड ५२ बलमा १ चौकासहित ३० रनमा आउट भए । विकेटकिपर नान निकोल एटन २१ र स्टेफन ब्राड २४ रनमा आउट भए । ओमानका तीव्र गतिका बायाँ हाते बलर बिलाल खानले १० ओभरमा १ मेडनसहित ४२ रन खर्चेर ४ विकेट लिए । कलिमुल्लाहले २ नेस्टर धम्बा र खवर अलीले १–१ विकेट लिए ।

२ सय २७ रनको विजयी लक्ष्य पछ्याएको ओमान ४२.१ ओभरमा १ सय १६ रनमा अल आउट भयो । ओमानका कप्तान खवर अलीले ९९ बलमा ३ चौकासहित सर्वाधिक ४३ रन बनाए । ओपनर कश्याप प्रजापति १२, शोएब खान ५, जतिन्दर सिंह शून्य, मोहम्मद नदिम १५ र सन्दीप गौड १७ रनमा आउट भए । नामिबियाका डेविड विजा, जेजे स्मिट, टांगेनी लुंगामेनी र जान फ्रिलिंकले २-२ विकेट लिए ।

नामिबिया, युएई र ओमानबीच त्रिकोणात्मक सिरिज जारीछ । पहिलो खेलमा ओमानले युएईलाई १२ रनले हराएको थियो । ओमानले बुधबार युएईसँग खेल्नेछ । नामिबियाले मंगलबार युएईसँग खेल्नेछ । यस सिरिजपछि विश्वकप लिग २ अन्तर्गत नेपाल, युएई र पपुवा न्युगिनीबीच त्रिकोणात्मक ओडिआई सिरिज हुने छ ।

नेपालले मार्च १६ मा पपुवा न्युगिनीसँग खेल्दै सुरुवात गर्नेछ । ७ देशबीच २०२३ सम्म चल्ने यस प्रतियोगितामा शीर्ष तीन टोलीले सिधैं एकदिवसिय विश्वकप ग्लोबल छनोट खेल्न पाउनेछन् ।

अंक तालिका

ओमान २५ खेलमा १५ मा जित र ८ मा हार सहित ३२ अंक जोड्दै शीर्षस्थानमा छ । स्कटल्यान्ड १२ खेलमा ७ मा जित र ३ मा हार सहित १६ अंकका साथ दोस्रो स्थानमा छ । अमेरिका १६ खेलमा ७ मा जित र ९ मा हार सहित तेस्रो स्थानमा छ ।

नामिबिया १० खेलमा ६ मा जित र ४ मा हार सहित १२ अंकका साथ चौथो स्थानमा उक्लिएको छ । युएई ११ खेलमा ५ मा जित र ४ मा हारसहित १२ अंकका साथ पाँचौं स्थानमा छ । नेपाल ८ खेलमा ४ मा जित र ४ मा हारसहित ८ अंकका साथ छैटौं स्थानमा छ । पपुवा न्युगिनी १२ खेलमा १२ मानै हारका साथ पुछारमा छ ।