काठमाडौं (हाम्रो खेलकुद) – नेपालका मध्यक्रमका ब्याटर दीपेन्द्रसिंह ऐरीले दोस्रो अभ्यास खेलमा श्रीलंका नेभीविरुद्ध अर्धशतक प्रहार गर्दै आउट भएका छन् ।

टस हारेर ब्याटिङ थालेको नेपालले २८.४ ओभरमा ६ विकेट गुमाउँदै १ सय ३० रन बनाएको छ ।अर्धशतक बनाएका दीपेन्द्र २९ औं ओभरमा ६३ रनमा आउट भएका छन् । खराब सुरुवात गरेको नेपाललाई दीपेन्द्रले अर्धशतक प्रहार गर्दै इनिङलाई उकासे ।

एक समय ११.४ ओभरमा ३०-४ को कमजोर अवस्थामा पुगेको नेपाललाई पाँचौं विकेटका लागि पवन सरार्फ र दीपेन्द्रको साझेदारीले अघि बढाएका थिए । पवन पनि धेरै समय क्रिजमा टिक्न सकेनन् । पवन २२ रनमा आउट भए ।

नेपालले ओपनर ज्ञानेन्द्र मल्ल १ र कुशल भुर्तेल ३ रनमा गुमाएको थियो । त्यसपछि युवा ब्याटर रोहित कुमार पौडेल ३ र विनोद भण्डारी २ रनमा आउट भएपछि नेपालले निकै खराब सुरुवात गरेको थियो ।

नेपालले पहिलो खेलबाट टोलीमा ३ परिवर्तन गर्दै पवन सर्राफ, भीम सार्की र विवेक यादवलाई प्लेइङ ११ मा ल्याएको छ । पहिलो खेल खेलेका आसिफ शेख, कमलसिंह ऐरी र करण केसीले दोस्रो खेलका लागि विश्राम पाएका छन् । पहिलो खेलमा नेपालले १ सय ११ रनको जित निकालेको थियो ।

युएईमा हुने आइसिसी विश्वकप लिग९२ त्रिकोणात्मक ओडिआई त्रिकोणात्मक सिरिज अघि नेपालले अभ्यासको लागि श्रीलंका भ्रमण गरेको हो । श्रीलंकामा एक हप्ताको बसाईंपछि मार्च १४ मा नेपाली टोली युएई पुग्नेछ । यसपछि टोलीले मार्च १० मा श्रीलंका पुलिस र मार्च ११ मा प्रथम श्रेणीका खेलाडी सम्मिलित कोलोम्बो ११ सँग खेल्नेछ ।

।