काठमाडौं (हाम्रो खेलकुद) – नेपालले दोस्रो अभ्यास खेलमा श्रीलंका नेभी स्पोर्ट्स क्लबलाई १ सय ९७ रनको मध्यम लक्ष्य दिएको छ । टस हारेर ब्याटिङ थालेको नेपाल ४३.४ ओभरमा १ सय ९७ रनमा अल आउट भयो ।

नेपालका लागि दीपेन्द्रसिंह ऐरीले ७९ बलमा ५ चौका र १ छक्कासहित सर्वाधिक ६५ रन बनाए । भीम सार्कीले ४२ बलमा १ छक्कासहित ३० रन बनाए । ओपनर कुशल भुर्तेल १२ बलमा ३ रनमा बोल्ड भए । अर्का ओपनर ज्ञानेन्द्र मल्ल ९ बल खेल्दै १ रनमा आउट भए ।

तेस्रो नम्बरमा ब्याटिङ गरेका रोहित कुमार पौडल १८ बलमा ८ रन मात्र बनाउन सके । विनोद भण्डारी २ रनमा आउट हुँदा नेपाल ११.५ ओभरमा ३२–४ को कमजोर अवस्थामा पुगेको थियो । पाँचौं विकेटका लागि दीपेन्द्र र पवन सरार्फले ४८ रनको साझेदारी गरेका थिए । पवन २९ बलमा १ चौकासहित २२ रनमा आउट भए ।

युवा ब्याटर विवेक यादवले ३२ बलमा २ चौका र १ छक्का सहित २६ रन जोडे । सन्दीप १५ बलमा १ चौका र १ छक्कासहित १४ रनमा अविजित रहँदा विक्रम सोब १ र सागर ढकाल ७ रनमा आउट भए ।

नेपाल पहिलो खेलमा सोमबार नेभीसँगनै ३७.१ ओभरमा २ सय १४ रनमा अल आउट भएको थियो । उक्त खेलमा दीपेन्द्रलेनै सर्वाधिक ४३ रन बनाएका थिए । पहिलो खेलको तुलनामा नेपालले दोस्रो खेलमा ब्याटिङमा झनै खराब प्रदर्शन गरेको हो ।

नेपालले पहिलो खेलबाट टोलीमा ३ परिवर्तन गर्दै पवन सर्राफ, भीम सार्की र विवेक यादवलाई प्लेइङ ११ मा ल्याएको छ । पहिलो खेल खेलेका आसिफ शेख, कमलसिंह ऐरी र करण केसीले दोस्रो खेलका लागि विश्राम पाएका छन् । पहिलो खेलमा नेपालले १ सय ११ रनको जित निकालेको थियो ।

युएईमा हुने आइसिसी विश्वकप लिग–२ त्रिकोणात्मक ओडिआई त्रिकोणात्मक सिरिज अघि नेपालले अभ्यासको लागि श्रीलंका भ्रमण गरेको हो । श्रीलंकामा एक हप्ताको बसाईंपछि मार्च १४ मा नेपाली टोली युएई पुग्नेछ । यसपछि टोलीले मार्च १० मा श्रीलंका पुलिस र मार्च ११ मा प्रथम श्रेणीका खेलाडी सम्मिलित कोलोम्बो ११ सँग खेल्नेछ ।