एजेन्सी – घरेलु टोली युनाइटेड अरव इमिरेट्स (युएई) ले आइसिसी विश्वकप लिग–२ मा नामिबियामाथि उत्कृष्ट पूनरागमन जित हात पारेको छ । युएईले नामिबियालाई तीन विकेटले पराजित गर्दै विश्वकप लिग–२ को अंक तालिकामा तेस्रो स्थानमा उक्लिएको छ ।

२ सय ७ रनको मध्यम विजयी लक्ष्य पछ्याएको युएईले ४७.१ ओभरमा ७ विकेट गुमाउँदै पूरा गर्यो । युएईको जितमा आठौं नम्बरका ब्याटर काशिफ दाउदले ८६ बलमा ५ चौका र ४ छक्कासहित ७६ रनमा अविजित रहे । बासिल हामिद ७५ बलमा ४ चौकासहित महत्वपूर्ण ६२ रनको योगदान दिए ।

एक समय १९.२ ओभरमा ५३–६ को कमजोर अवस्थामा पुगेको युएईलाई सातौं विकेटका लागि काशिफ दाउद र बासिल हामिदले १ सय ४८ रनको सानदार शतकीय साझेदारी गर्दै उत्कृष्ट पूनरागमन जित दिलाए । चिराग सुरी १२, वृत्य अरविन्द १९, मोहम्मद वासिम ६, आसिफ खान ४ र रोहन मुस्तफा ३ रनमा आउट भए । नामिबियाका जेजे स्मित १० ओभरमा १ मेडनसहित ३६ रन खर्चेर प्रमुख ४ विकेट लिए ।

त्यसअघि आइसिसी एकेडेमी दुबईमा टस हारेर ब्याटिङ थालेको नामिबियाले ५० ओभरमा ८ विकेट गुमाउँदै २ सय ६ रन बनाएको थियो । नामिबियाका डेविड विजाले ८४ बलमा ४ चौका र १ छक्कासहित सर्वाधिक ६७ रन बनाए । ज्यान फ्रिलिंकले ७० बलमा ५ चौकासहित ५७ रनमा अविजित रहे । एक समय २९.१ ओभरमा ८३–७ को दयनिय अवस्थामा पुगेको नामिबियालाई आठौं विकेटका लागि विजा र फ्रिलिंकले १ सय १५ रनको शतकीय साझेदारी गरेका थिए ।

युएईका जहुर खानले ३ र जुनैद्द सिद्दिकले २ विकेट लिए । विश्वकप लिग-२ अन्तर्गत नामिबिया, युएई र ओमानबीच त्रिकोणात्मक सिरिज जारीछ । यस सिरिजपछि विश्वकप लिग-२ अन्तर्गत नेपाल, युएई र पपुवा न्युगिनीबीच त्रिकोणात्मक ओडिआई सिरिज हुनेछ । नामिबियाले शुक्रबार ओमानसँग खेल्नेछ । युएईले भोली ओमानसँग खेल्नेछ ।

नेपालले मार्च १६ मा पपुवा न्युगिनीसँग खेल्दै सुरुवात गर्नेछ । ७ देशबीच २०२३ सम्म चल्ने यस प्रतियोगितामा शीर्ष तीन टोलीले त्यसै वर्ष हुने सिधैं एकदिवसिय विश्वकप ग्लोबल छनोट खेल्न पाउनेछन् । पुछारका चार टोलीले प्लेअफ खेल्नुपर्ने हुन्छ ।

अंक तालिका

ओमान २५ खेलमा १५ मा जित र ८ मा हार सहित ३२ अंक जोड्दै शीर्षस्थानमा छ । स्कटल्यान्ड १२ खेलमा ७ मा जित र ३ मा हार सहित १६ अंकका साथ दोस्रो स्थानमा छ । युएई १२ खेलमा ६ मा जित र ४ मा हार सहित १४ अंकका साथ तेस्रो स्थानमा उक्लिएको छ ।

अमेरिका १६ खेलमा ७ मा जित र ९ मा हार सहित १४ अंक भएपनि नेटरनरेटका कारण चौथो स्थानमा छ । नामिबिया ११ खेलमा ६ मा जित र ५ मा हार सहित १२ अंकका साथ पाँचौं स्थानमा छ । नेपाल ८ खेलमा ४ मा जित र ४ मा हारसहित ८ अंकका साथ छैटौं स्थानमा छ । पपुवा न्युगिनी १२ खेलमा १२ मानै हारका साथ पुछारमा छ ।