काठमाडौं (हाम्रो खेलकुद) – तपाईंहरुले टोल कपदेखि विश्वकप सम्म क्रिकेट प्रतियोगिता आयोजनाका विभिन्न पाटोबारे भएको सुन्नु भएको होला । तर क्रिकेट प्रतियोगिता आयोजना हुँदा सार्वजनिक बिदा दिएको भने पक्कै सुन्नु भएको सायदै हुनुपर्छ । तर नेपालको मधेश प्रदेशको रौतहट जिल्लामा रहेको ईशनाथ नगरपालिकाले क्रिकेट आयोजना गर्न दुई दिन सार्वजनिक बिदा दिएको छ ।

ईशनाथ नगरपालिकाबाट आयोजना भएको अन्तर पालिका स्तरिय मेयर टि२० क्रिकेट प्रतियोगिता अन्तिम चरणको खेलको लागि दुई दिन सार्वजनिक बिदा दिने निर्णय गरेको हो । नगरपालिका कर्मचारी समेत सहभागी व्यवस्थापन गर्नुपर्ने जनाउँदै फागुन २५ र २६ गतेलाई नगरपालिका भित्र सार्वजनिक बिदा दिएको जनाएको छ । ईशनाथ नगरपालिका मेयर सन्तोष कुमार मेहताले दुई दिन सार्वजनिक बिदा दिएको जनाएका छन् ।

नगरप्रमुख मेहताको अनुसार बारा र रौतहटका गरि कुल १६ पालिकाले प्रतियोगितामा सहभागी जनाएका छन् । ‘बारा र रौतहटका गरि कुल १६ पालिका छन् । पालिका भित्र रहेका खेलाडीलाई एउटा टिम बनाएर प्रतियोगिता गराउने प्रयास हो । खेलाडीहरुलाई अघि बढाउने उदेश्यले गरेका हौं’, मेयर सन्तोषले हाम्रो खेलकुदसँग भने ।

क्रिकेट प्रतियोगिता आयोजना गर्न दुई दिन सार्वजनिक बिदा दिन मिल्छ र भन्ने प्रश्नमा मेयर र नगर उप प्रमुख हुसेन आरा दुवैले कुनैपनि प्रतिक्रिया नदिई फोन काट्दै बच्न खोजे ।

क्रिकेट आयोजना गर्न नगरपालिकाले सार्वजनिक बिदा दिदा स्थायिनले चर्को आलोचना गरेका छन् । प्रतियोगिताका सेमिफाइनल खेलहरु आज हुनेछन् । विजेताले २५ हजार र उपविजेताले १५ हजार पाउनेछन् ।