काठमाडौं (हाम्रो खेलकुद) – चार ब्याटरको अर्धशतकको सहयोगमा नेपालले तेस्रो अभ्यास खेलमा श्रीलंका पुलिस क्लबलाई ३ सय ३२ रनको विशाल लक्ष्य दिएको छ ।

नेपालका लागि रोहित कुमार पौडेलले ७७ बलमा २ चौका र २ छक्कासहित सर्वाधिक ७२ रनको योगदान दिए । ओपनर कुशल भुर्तेल ४८ बलमा ८ चौकासहित ५७ रनमा आउट भए ।

पहिलो विकेटका लागि आसिफ शेख र कुशल भुर्तेलले १३.१ ओभरमा १ सय ७ रनको उत्कृष्ट शतकीय साझेदारी गर्दै उत्कृष्ट सुरुवात दिलाए । आसिफ ५० बलमा ५ चौका र २ छक्कासहित ५२ रनमा राजकरुणाको बलमा बोल्ड आउट भए । आरिफ शेख २६, विनोद भण्डारी ३, भीम सार्की २ र पवन सरार्फ ३ रनमा आउट भए ।

तल्लोक्रममा करण केसीले ३६ बलमा ६ छक्कासहित ५३ रनको आक्रामक इनिङ खेलेका थिए । कमलसिंह ऐरी ३६ बलमा ४ चौका र २ छक्कासहित ४५ रनमा अविजित रहे । आठौं विकेटका लागि कमल र करणले १ सय २ रनको विष्फोटक साझेदारी गरेका थिए । श्रीलंका पुलिसका डि राजकरुणा र टि सम्पथले २-२ विकेट लिए ।

यसअघि नेपालले पहिलो अभ्यास खेलमा श्रीलंका नेभी स्पोर्ट्स क्लबलाई १ सय ११ रन र दोस्रो खेलमा ८२ रनले पराजित गरेको थियो । नेपालले अन्तिम खेल शुक्रबार श्रीलंका संयुक्त ११ सँग खेल्नेछ । मार्च १४ मा नेपाल युएई पुग्नेछ । विश्वकप लिग-२ मा नेपालले पहिलो खेल मार्च १६ मा पपुवा न्युगिनी ९पिएनजी० सँग खेल्दै सुरुवात गर्नेछ ।

२२ मार्च सम्म नेपाल युएईमा रहनेछ । त्यसपछि नेपाल स्वदेश फर्किनेछ । पिएनजीपनि नेपाल आउनेछ । पिएनजी र नेपालबीच दुई ओडिआई खेल हुनेछ । नेपाल, पिएनजी र मलेसियाबीच त्रिकोणात्मक टि२० आई सिरिज खेल्नेछ ।

नेपालले चैत ११ (मार्च २५) मा पपुवा न्युगिनीसँग पहिलो ओडिआई खेल खेल्ने छ । चैत १२ ९२६ मार्च० मा दोस्रो ओडिआई खेल खेल्ने छ । त्रिकोणात्मक टि२० आई सिरिज भने चैत १४ देखि २१ गर्ते ( मार्च २८ देखि ४ अप्रिल) सम्म टियु मैदानमा हुनेछ ।

नेपालको प्लेइङ ११ : सन्दीप लामिछाने (कप्तान), करण केसी, कुशल भुर्तेल, आसिफ शेख, कमलसिंह ऐरी, विनोद भण्डारी, सागर ढकाल, रोहित कुमार पौडेल, भीम सार्की, पवन सरार्फ र आरिफ शेख ।