काठमाडौं (हाम्रो खेलकुद) – कप्तान अहमद फैज र सैद अजिजको उत्कृष्ट ब्याटिङमा मलेसियाले त्रिकोणात्मक टि२० आई सिरिजमा पपुवा न्युगिनीलाई १ सय ९७ रनको विशाल लक्ष्य दिएको छ ।

टियु क्रिकेट मैदानमा टस हारेर ब्याटिङ थालेको मलेसियाले निर्धारित २० ओभरमा ६ विकेट गुमाउँदै १ सय ९६ रन बनायो । मलेसियाका कप्तान अहमद फैजले ४३ बलमा ५ बलमा चौका र ३ छक्कासहित ६३ रनको योगदान दिए । उनको यो तेस्रो टि२० आई र पपुवा न्युगिनीविरुद्ध लगातार दोस्रो अर्धशतक हो ।

करिअरको टि२० आईमा उत्कृष्ट प्रदर्शन हो । बायाँ हाते युवा स्टार सैद अजिजले ३५ बलमा ८ चौका र ३ छक्कासहित सर्वाधिक ६४ रन बनाए ।
तेस्रो विकेटका लागि अजिज र फैजले १ सय १५ रनको शतकीय कीर्तिमानी साझेदारी गरेका थिए । मलेसियाबाट पहिलो पटक टि२० आईमा शतकीय साझेदारी भएको हो । यसअघि पपुवा न्युगिनीविरुद्ध यसै सिरिजमा विरनदीपसिंह र अहमद फैजले दोस्रो विकेटका लागिनै ९५ रनको उच्च साझेदारी गरेका थिए ।

ओपनर विरनदीपसिंह १५ बलमा १ चौकासहित १० रनमा आउट भए । ओपनर जुबैद जुल्किफ्लीले २२ बलमा ४ चौका र ४ छक्कासहित ४६ रन जोड्दै आक्रामक सुरुवात दिलाएका थिए । पपुवा न्युगिनीका काबुआ मोरेआले ३ ओभरमा २९ रन खर्चेर ४ विकेट लिए । चाद सोपर र राइली हेकुरेले १–१ विकेट लिए ।

पपुवा न्युगिनीलाई फाइनलमा पुग्न मलेसियालाई फराकिलो अन्तरले हराउनुपर्छ । त्यतिमात्र होईन अन्तिम खेलमा शनिबार मलेसियाले नेपालसँग पनि फराकिलो अन्तरले हार्नु पर्छ । यो अवस्थामा दुबै टोलीको २-२ अंक हुँदा नेटरनरेटको आधारमा पपुवा न्युगिनी फाइनलमा पुग्न सक्छ । पपुवा न्युगिनी पहिलो खेलमा नेपालसँग १५ रन , मलेसियासँग ८ रन र नेपालसँग ३७ रनले पराजित भएको थियो ।

मलेसिया यस खेलमा विजयी भएमा भने स्वत फाइनलमा पुग्नेछ । यस खेलमा पराजित भए पनि अन्तिम खेलमा नेपाललाई हराएमा मलेसिया फाइनलमा पुग्नेछ । ९ ओभरमा २ विकेट गुमाउँदै ७६ रन बनाएको छ।