काठमाडौं (हाम्रो खेलकुद) – नेपालले जिम्बावे ए सँग आज तेस्रो तथा निर्णायक एकदिवसिय अभ्यास खेल खेल्दैछ । खेल बिहान ९ ः ३० मा टियु क्रिकेट मैदानमा सुरुहुनेछ ।

तीन एकदिवसिय सिरिज १–१ को बराबरीमा छ । पहिलो खेलमा जिम्बावे ए ३ विकेटले विजयी भएको थियो । दोस्रो खेलमा नेपालले ९ विकेटको जित हात पारेको थियो । यस खेल खेल्ने टोलीले सिरिज पनि जित्नेछ । दुबै टोली सिरिजमा जितका साथ अन्त्य गर्न चाहन्छन् ।

नेपाल पछिल्लो खेलमा सानदार प्रदर्शनका साथ उच्च मनोबलमा छ । जिम्बावे भने केहि दबाबमा हुनेछ । ओपनर सुनिल धमला र आसिफ शेखले पहिलो खेलमा राम्रो प्रदर्शन गरेका थिए । यी दुबैलाई आज ओपनिङ गराउनेछ । प्रशिक्षक पुबुदु दासानायिकले दोस्रो खेलापछि अन्तिम खेलमा देव खनालले मौका पाउने बताएका थिए । देवलाई मौका दिन कुशल भुर्तेल र आरिफ शेख मध्य एकलाई बेन्चमा राख्नुपर्ने हुन्छ ।

चौथोमा रोहित पौडेल र पाँचौंमा दीपेन्द्रसिंह ऐरी हुनेछन् । यी दुई ब्याटरबाट नेपाल उच्च प्रदर्शन चाहन्छ । विकेटकिपरमा विनोद भण्डारीले निरन्तरता पाउनेछन् । पछिल्लो खेलमा सोमपाल कामी र करण केसीको जोडीले उच्च प्रदर्शन गरेका थिए । स्पिनरमा सागर र सन्दीपलाई निरन्तरता दिनेछ ।

जिम्बावेको दुबै खेलमा ब्याटिङ राम्रो हुन सकेको छैन । जिम्बावे ए का इनोसेन्ट कैया र तडिवानाशे मरुमानीबाट उत्कृष्ट सुरुवात चाहन्छ । रोय कैया र टोनी मन्योङ्गा मध्यक्रमका हतियार हुन् । तीव्र गतिका बलर ब्राड इभान्सले तल्लोक्रममा राम्रो सम्भावना देखाएका छन् ।

लगातार वर्षाको कारण टसनै जितको टर्निङ प्वाइन्ट बनेको छ । दुबै खेलमा पहिला ब्याटिङ गर्ने टोली पराजित भएका छन् । त्यसैले टसले ठूलो महत्व राख्ने देखिन्छ ।