काठमाडौं (हाम्रो खेलकुद) – नेपालले आइसिसी यू-१९ महिला टि२० विश्वकप एसिया छनोटमा आज भुटानसँग खेल्दैछ । खेल नेपाली समय अनुसार बिहान ११ बजे मलेसियाको किनरारा एकेडेमी ओभलमा सुरुहुनेछ ।

भुटान पहिलो र नेपाल दोस्रो जितको सोचमा छन् । नेपाल युएईसँग ८ रनमा अल आउट हुँदै आफ्नो इतिहासकै खराब प्रदर्शन गरेको थियो । ६ टोली सम्मिलित प्रतियोगितामा शीर्ष स्थानमा रहँदै आगमी वर्ष दक्षिण अफ्रिकामा हुने यू१९ महिला टि२० विश्वकपमा पुग्न नेपालले बाँकी सबै खेलमा फराकिलो अन्तरले जित्नुपर्छ ।

सबै खेलमा जितले मात्र पुग्दैन । युएईले थाईल्यान्डसँग लज्जास्पद हार हार्नुपर्ने हुन्छ । नेपालले थाईल्यान्डलाई त्यतिनै फराकिलो अन्तरले हराउनुपर्छ । अन्यथा नेपालको विश्वकप सपना देखिदैन । अथवा अन्य कुनै टोलीसँग थाईल्यान्ड र युएईले कम्तिमा एक एक खेलमा फराकिलो हार बेहोर्नु पर्छ ।

युएईसँग ८.१ ओभरमा नेपाल ८ रनमा अल आउट भएको थियो । पहिलो खेलमा भने कतारलाई ७९ रनले पराजित गरेको थियो । भुटान पहिलो खेलमा थाईल्यान्डसँग १ सय ३० रनले पराजित भएको थियो । १ सय ८३ रनको विजयी लक्ष्य पछ्याउनेक्रममा ८ विकेट गुमाउँदै ५२ रन जोडेको थियो ।

भुटान युएईसँग १ सय ६० रनले पराजित भएको थियो । २ सय ३ रनको विशाल लक्ष्य पछ्याउनेक्रममा ७ विकेट गुमाउँदै ४२ रन बनाएको थियो । नेपालका साना प्रविन, किरण कुमारी कुँवर, अञ्जली विश्वकर्मा र आश्मा पुलामी मगर शीर्षक्रमका ब्याटर हुन् । सृष्टि जैशी मध्यक्रमकी ब्याटर हुन् ।

यी पाँच खेलाडीलाई सम्हाल्लिएर खेल्न आवश्यक देखिन्छ । अनु कडायत, सृष्टि र कप्तान कृतिका मरासिनी नेपालका बलर हुन् । भुटानको लागि मध्यक्रमकी सोनम प्रमुख अलराउन्डर हुन् । उनले ब्याटिङ र बलिङ दुबैमा राम्रो प्रदर्शन गर्नसक्छिन् । चाडो ओम, पेम्बा र कप्तान न्गवांग चोडेन प्रमुख खेलाडी हुन् ।

समान दुई खेलमा नेटरनरेटमा माथि रहँदै युएई शीर्ष र थाईल्यान्ड दोस्रो स्थानमा छन् । नेपाल २ खेलमा १ मा जित र १ मा हार सहित तेस्रो स्थानमा छ । मलेसिया २ अंकका साथ चौथो स्थानमा छ । अंक विहीन कतार पाँचौं र भुटान पुछारमा छ ।