एजेन्सी – सक्रिय खेलाडी जीवनबाट एकदिन सन्न्यास लिनुपर्छ । कोही खेलाडी छिटो त कोही ढिलो सन्न्यास लिन्छन् । त्यो प्रदर्शनमा निर्भर रहन्छ । सन्न्यासपछि खेलाडीले एउटा बाटो रोज्नुपर्छ । धेरै खेलाडी प्रशिक्षक बन्ने गर्दछन् । अन्य थुप्रै क्षेत्रमा हात हाल्ने गर्दछन् ।

खेलाडी जीवनपछि केहि खेलाडी राजनीतिमा लाग्दै देशको नेतृत्व गर्न खोज्छन् । त्यसमा थोरै सफल भएका छन् । केहि खेलाडी राजनीतिमा सफल मात्र भएका छैनन् प्रधानमन्त्रीदेखि राष्ट्रपति सम्मको पद सम्हालेका छन् । विश्व क्रिकेटका पाँच खेलाडी जो प्रधानमन्त्री बन्दै देश नेतृत्व गरे । उनीहरुको बारे छोटकरीमा जानकारी ।

५. कमिसेस मारा

रातु सर कमिसिसी मारालाई फिजी राष्ट्रको संस्थापक पिता हुन् । उनी फिजीका राजनेता हुन् । सुरुमा उनी १९७६ देखि १९७० सम्म मुख्यमन्त्रीको रुपमा काम गर्दै राजनीतिमा लागे । त्यसमा सफल भूमिका निर्वाह गरेपछि उनी पहिलो पटक १९७० देखि १९९२ सम्म प्रधानमन्त्रीको रुपमा काम गरेका थिए ।

मारा फिजीको पहिलो प्रधानमन्त्री समेत हुन् । उनी १९९२ देखि १९९३ सम्म फिजीको पहिलो उपराष्ट्रपतिको रुपमा काम गरे । १९९४ देखि २००० सम्म राष्ट्रपतिको रुपमा काम गरेका थिए ।

माराले दुई प्रथम श्रेणी फिजीबाट ओटागो र क्यान्टरबरीबाट १९५३/५४ मा न्युजिल्यान्ड भ्रमणमा खेलेका थिए । त्यससमय उनी टोलीका उपकप्तान निए । तीव्र गतिका बलर रहेपनि उनको करिअर चोटका कारण सकिएको थियो ।

माराले ओन्टागोविरुद्ध डेब्यू गर्दै ७ विकेट लिएका थिए । उनले क्यान्टबरीविरुद्ध ४४ रन बनाएका थिए । उनले दुई खेलमा ६४ रन बनाउनुको साथै ८ विकेट लिएका थिए । ठूलो सम्भावना बोकेका खेलाडी भएपनि चोटका कारण क्रिकेट करिअर टुङ्गाउनु परेको थियो । क्यान्टरबरीविरुद्ध खेलको क्रममा उनको हात भाँचिएको थियो ।

४. नवाज शरिफ (पाकिस्तान)

विश्वकप विजेता इमरान खान भन्दा अघि पाकिस्तानमा क्रिकेटररुपमा प्रधानमन्त्री बन्ने पहिलो खेलाडी नवाज शरिफ थिए । उनले १९७३-७४ को समयमा पाकिस्तान रेलवेबाट पाकिस्तान इन्टरनेशनल एरलायन्सविरुद्ध डेब्यू गर्दै डक आउट भएका थिए । त्यसपछि व्यावसायिक क्रिकेट खेलेनन् । उनी १९९० को नोभेम्बर देखि १९९३ को जुलाई सम्म प्रधानमन्त्रीको रुपमा काम गरेका थिए ।

३. एलेक डगलस– होम (बेलायत )

युनाइटेड किंगडम (बेलायत) इंग्ल्यान्ड, स्कटल्यान्ड, वेल्स र नर्थ आयरल्यान्ड मिलेर बनेको छ । एलेक ब्रिटिसको रुढीबादी सोच भएका प्रधानमन्त्री थिए । उनी १९६३ अक्टोबर देखि १९६४ प्रधानमन्त्रीको रुपमा काम गरेका थिए ।

एलेक युवा प्रतिभाशाली खेलाडी थिए । उनले इंग्ल्यान्डको चर्चित टोली मिडलसेक्स र अक्सफोर्डबाट व्यवसाहिक क्रिकेट खेलेका थिए । मिडलसेक्सबाट उनले १९२४ देखि १९२७ सम्म १० प्रथमश्रेणी खेल खेल्दै १ सय ४७ रन बनाएका थिए । औसत १६.३३ को रहँदा उच्च स्कोर ३७ रह्योे ।

तीव्र गतिका बलर एलेले १२ विकेट लिएका थिए । १९२६/२७ को दक्षिण अफ्रिका भ्रमणको समयमा मेरिलेबोन क्रिकेट क्लब(एमसिसी) बाट अजेन्टिनाविरुद्ध अन्तर्राष्ट्रिय खेल खेल्ने अवसर पाएका थिए।

विदेश र राष्ट्रमण्डल कार्यालयमा प्रधानमन्त्री एडवर्ड हेथको मन्त्रिपरिषद्मा सेवा गरिसकेपछि, लर्ड डुङ्गलासले आफ्ना शक्तिशाली प्रतिद्वन्द्वी ह्यारोल्ड हिल्सनलाई पछि पार्दै बेलायतको प्रधानमन्त्री बनेका थिए ।

२. फ्रान्सिस बेल (न्युजिल्यान्ड)

सर फ्रान्सिस बेल न्युजिल्यान्डमा जन्मिएर प्रधानमन्त्री बन्ने पहिलो ब्यक्ति हुन् । उनले आधिकारीक रुपमा १९२५ देखि मे १० देखि ३० सम्म छोटो समयमा प्रधानमन्त्री बनेका थिए ।

किशोर अवस्थामा बेल सम्भावना बोकेका क्रिकेट खेलाडी थिए । उनले न्युजिल्यान्डको वेलिंग्टनबाट दुई प्रथम श्रेणी खेल खेले । तर राष्ट्रिय स्तरमा फस्टाउन नसकेपछि उनी राजनीतिमा प्रवेश गरेका थिए । उनको दुई खेलमा प्रदर्शन २ रन थियो ।

नेल्सनमा जन्मे र हुर्केका बेलले क्याम्ब्रिज विश्वविद्यालयबाट स्नातक गरेका थिए । वेलिंग्टनको मेयरको रूपमा आफ्नो राजनीतिक कार्यकालको सुरुवात गरेका उनको राजनीतिक करियरको अन्त्यमा उनी प्रधानमन्त्री बने । तर मात्र १६ दिनको लागि प्रधानमन्त्री बेनेका थिए ।

१. इमरान खान (पाकिस्तान)

इमरान खान प्रधानमन्त्री बन्ने विश्वका सबैभन्दा चर्चित क्रिकेटर हुन् । विश्व क्रिकेटका एक उत्कृष्ट अलरान्डरको छवि बनाएका इमरान खानले २२ वर्षको संघर्षपछि प्रधानमन्त्री बन्ने सपना पूरा गरेका थिए । इमरान खान पाकिस्तानका सबैभन्दा सफल कप्तान मध्यका एक हुन् । विश्वका उत्कृष्ट अलराउन्डर खेलाडीमा पर्दछन् ।

खानको कप्तानीमा सन् १९९२ मा पाकिस्तानले पहिलो पटक विश्वकप उपाधि जितेको थियो । उनले ८८ टेस्ट खेलमा ६ शतक र १८ अर्धशतकसहित ३ हजार ८ सय ७ रन बनाएका छन् । ३ सय ६२ विकेट लिएका छन् । १ सय ७५ ओडिआई खेलमा १ शतक र १९ अर्धशतकसहित ३७ सय रन बनाएका थिए । ओडिआईमा १ सय ८२ विकेट लिएका छन् ।

खानले टेस्ट १९७१ देखि १९९२ सम्म खेलेका थिए । ओडिआई भने १९७४ देखि १९९२ सम्म खेलेका थिए । पाकिस्तानलाई विश्वकप जिताएपछि उनले क्रिकेट छाड्दै राजनीति सुरु गरेका थिए ।

खान पाकिस्तानका २२ औं प्रधानमन्त्री हुन् । उनले २०१८ अगष्ट देखि २०२२ अप्रिल सम्म तीन वर्ष २ सय ३५ दिन पाकिस्तानको प्रधानमन्त्रीको रुपमा काम गरेका थिए ।