काठमाडौं (हाम्रो खेलकुद) – नेपालका कप्तान सन्दीप लामिछानेले आइसिसी विश्वकप लिग २ त्रिकोणात्मक ओडिआई सिरिजमा नामिबियाविरुद्ध सानदार बलिङ गरेका छन् । कम्बसदुन न्यू ग्राउन्ड, एयरमा टस जितेर पहिला ब्याटिङ थालेको नामिबियाले २८ ओभरमा ६ विकेट गुमाउँदै १ सय १४ रन बनाएको छ ।

नामिबियाका कप्तान जेहार्ड एरास्मस ७० बलमा ४ चौका र १ छक्का सहित ५३ रनमा सन्दीपको बलमा स्टम्पिङ आउट भए । उनले ५६ बलमा आफ्नो ओडिआई करिअरको पाँचौं अर्धशतक पूरा गरे ।

खराब सुरुवात गरेपनि चौथो विकेटका लागि एरास्मस र जान निकोल लोफ्टी इटनले ६८ रनको साझेदारी गर्दै नामिबियालाई खेलमा फर्काएका छन् । निकोल सन्दीपको बलमा बोल्ड हुनुअघि ३५ बलमा १ चौकासहित १९ रन बनाए ।

तीव्र गतिका बलर सोमपाल कामीले दोस्रो ओभरको पहिलो बलमा ओपनर लो हान्डी लोवरेन्सलाई २ रनमा बोल्ड आउट गरे । कप्तान सन्दीप लामिछाानेले सातौं ओभरको पहिलो बलमा नामिबियाका प्रमुख ब्याटर क्रेग विलियम्सलाई ५ रनमा बोल्ड गरे । उनी स्वीप खेल्ने चक्करमा मिस हुँदा बोल्ड भएका थिए ।

सोमपालले दशौं ओभरको पहिलो बलमा डेभिन ला ककलाई २७ रनमा बोल्ड आउट गरे । उनले ३० बलमा ५ चौका प्रहार गरे । ज्यान फिंलिकलाई सन्दीपले नै ३ रनमा बोल्ड आउट गरेका थिए ।

सन्दीपले ७ ओभरमा २ मेडनसहित २२ रन खर्चेर ४ विकेट लिएका छन् । सोमपाल कामीले ६ ओभरमा रन खर्चेर २ विकेट लिएका छन् । क्रिजमा जेजे स्मित २ र डेविड विजा १ छन् ।