एजेन्सी – विकेटकिपर ऋषभ पन्तको शतक र अलराउन्डर हार्दिक पान्ड्याको उत्कृष्ट अलराउन्ड प्रदर्शनमा भारतले इंग्ल्यान्डसँगको तीन ओडिआई खेलको सिरिज जितेको छ । भारतले तेस्रो खेलमा इंग्ल्यान्डलाई ५ विकेटले हराउँदै सिरिज २–१ ले जितेको हो ।

जितको लागि २ सय ६० रनको विजयी लक्ष्य पछ्याएको भारतले ४२.१ ओभरमा ५ विकेट गुमाउँदै पूरा गर्यो । भारतका विकेटकिपर ऋषभ पन्त १ सय १३ बलमा १६ चौका र २ छक्कासहित १ सय २५ रनमा अविजित रहे । पन्तको यो पहिलो ओडिआई शतक हो । पन्तले ४२ औं ओभरमा डेविड विल्लीलाई लगातार चौका प्रहार गरेका थिए ।

हार्दिक पान्ड्या ५५ बलमा १० चौकासहित ७१ रनमा आउट भए । पाँचौं विकेटका लागि पन्त र हार्दिकले १ सय ३३ रनको शतकीय साझेदारी गर्दै जितको आधार सहज बनाएका थिए । ओपनर रोहित शर्मा १७, शिखर धवन १, शिखर धवन १६ र विराट कोहली १७ रनमा आउट भए । इंग्ल्यान्डका रिस टोप्लीले सर्वाधिक तीन विकेट लिए ।

त्यसअघि म्यानचेस्टरमा टस हारेर पहिला ब्याटिङ गर्दै ४५.५ ओभरमा २ सय ५९ रनमा अल आउट भयो । इंग्ल्यान्डका कप्तान जस बटलरले ८० बलमा ३ चौका र २ छक्कासहित सर्वाधिक ६० रन बनाए । जेसन रोय ३१ बलमा ७ चौकासहित ४१, बेन स्टोक्स २७, मोईन अली ३४, क्रेग ओभरटन ३२, डेविड विल्ली १८ र लियाम लिभिङस्टोनले २७ रन बनाए ।

भारतका हार्दिक पान्ड्याले ७ ओभरमा ३ मेडनसहित २४ रन खर्चेर ४ विकेट लिए । युजभेन्द्र चहलले तीन र मोहम्मद शिराजले दुई विकेट लिए । पहिलो खेलमा भारत १० विकेटले विजयी हुँदा दोस्रो खेलमा १ सय रनले पराजित भएको थियो ।