एजेन्सी – फ्रान्सका १८ वर्षीय गुस्ताव म्याकिओनले टि२० आई क्रिकेटमा लगातार दोस्रो शतक हान्दै दुर्लभ विश्व कीर्तिमान बनाएका छन् । फिनल्यान्डमा जारी आइसिसी विश्वकप सब रिजनल युरोप क्षेत्र छनोट बी मा गुस्तावले स्विट्जरल्यान्ड र नर्वेविरुद्ध टि२० आईमा शतक हान्दै लगातार दुई शतक हान्ने पहिलो खेलाडी बनेका हुन् ।

विश्वका स्टार खेलाडीले बनाउन नसकेको कीर्तिमान उनले बनाएका हुन् । उनी टि२० आईमा सबैभन्दा कम उमेरमा शतक हान्ने खेलाडी समेत हुन् ।

पहिलो खेलमा स्विट्जरल्यान्डविरुद्ध ६१ बलमा ५ चौका र ९ छक्कासहित १ सय ९ रनको शतकीय इनिङ खेल्दै सबैभन्दा कान्छा खेलाडी बनेका थिए । तर फ्रान्स १ विकेटले पराजित भएको थियो । उने नर्वेविरुद्ध १ सय १ रनको शतकीय इनिङ खेल्दै टि२० आईमा लगातार दोस्रो शतक हान्ने पहिलो खेलाडी बने । शतक र तीन विकेटको सहयोगमा फ्रान्स ११ रनले विजयी भएको थियो ।

गुस्तावले १८ वर्ष २ सय ८० दिनमा शतक हान्दै टि२० आईका कान्छा शतकधारी बनेका थिए । उनले अफगानिस्तानका हज्रतुल्लाह जजाईले २० वर्ष ३ सय ३७ दिनमा शतक हानेको कीर्तिमान रोदेका थिए । गुस्तावले ३ टि२० आईमा दुई शतक र एक अर्धशतकसहित २ सय ८६ रन बनाएका छन् ।