एजेन्सी – भारतीय टेस्ट क्रिकेट टोलीका प्रमुख ब्याटर चेतेश्वर पुजाराले इंग्ल्यान्डको राष्ट्रिय एकदिवसिय प्रतियोगितामा आक्रामक शतक हानेका छन् ।

लिष्ट ए मान्यता प्राप्त रोयल लन्डन वान डे कपमा पुजाराले सक्सेसबाट वारविक्शायरविरुद्ध कप्तानी इनिङ खेल्नेक्रममा ७९ बलमा ७ चौका र २ छक्कासहित १ सय ७ रनको शतकीय इनिङ खेले । पुजाराले शतक हानेपनि टोली भने चार रनले पराजित भयो ।

जितको लागि ३ सय ११ रनको विजयी लक्ष्य पछ्याएको सक्सेसले निर्धारित ५० ओभरमा ७ विकेट गुमाउँदै ३ सय ६ रन बनायो । पुजाराले ७३ बलमा शतक पूरा गरेका थिए । जसक्रममा पुजाराले ४५ औं ओभरमा लियाम नोर्वेललाई तीन चौका र एक छक्कासहित एकै ओभरमा २२ रन जोडेका थिए ।

ओपनर अली ओरर १ सय २ बलमा ६ चौका र ३ छक्कासहित ८१ रनमा आउट भए । वारविक्यारका क्रुनाल पान्ड्याले १० ओभरमा ५१ रन खर्चेर ३ विकेट लिए । जर्ज ग्यारेट र ओलीभर ह्यानन डाल्बीले दुई दुई विकेट लिए ।

त्यसअघि बर्मिंघममा टस जितेर पहिला ब्याटिङ थालेको वारविक्शायरले निर्धारित ५० ओभरमा ६ विकेट गुमाउँदै ३ सय १० रन बनायो । उसका ओपनर रोब यट्स १ सय ११ बलमा १४ चौका र २ छक्कासहित सर्वाधिक १ सय ११ रनमा आउट भए ।

कप्तान विल रोड्सले ७० बलमा ७ चौका र २ छक्कासहित ७६ रनमा आउट भए । विकेटकिपर माइकल बर्गेस ५१ बलमा ३ चौका र ३ छक्कासहित ५८ रनमा आउट भए ।

सक्सेसका ब्राडली करी र एरिस्टाइड्स करवेलसीले दुई दुई विकेट लिए । भारतीय टोलीबाट मौका नपाएका खेलाडीले इंग्ल्यान्डमा घरेलु क्रिकेट खेल्दै आएका छन् । पुजारासँगै उमेश यादव, क्रुनाल पान्ड्या, वासिन्टन सुन्दर लगायतका खेलाडी छन् ।