एजेन्सी – हङकङले ओमानमा शनिबारबाट सुरु भएको एसिया कप टि२० छनोटको पहिलो खेलमा सिंगापुरलाई ८ रनले हराउँदै विजयी सुरुवात गरेको छ । जितको लागि १ सय ४९ रनको विजयी लक्ष्य पछ्याएको सिंगापुरले निर्धारित २० ओभरमा ७ विकेट गुमाउँदै १ सय ४० रन बनायो ।

सिंगापुरका जनक प्रकाशले ३२ बलमा ४ चौकासहित सर्वाधिक ३२ रन बनाए । ओपनर अरित दत्त २९, रिजा गाजनाभी १७, मनप्रीत सिंह १२ र अवि दीक्षित १९ रनमा आउट भए । हङकङका एहसान खानले ४ ओभरमा २० रन खर्चेर ३ विकेट लिए । मोहम्मद मोहम्मद गजनफारीले ४ ओभरमा २० रन खर्चेर २ विकेट लिए ।

त्यसअघि ओमानको अलअमरेतमा टस हारेर ब्याटिङको निम्तो पाएको हङकङले निर्धारित २० ओभरमा ९ विकेट गुमाउँदै १ सय ४९ रन बनायो । हङकङका किनचित शाहले ३२ बलमा २ चौकासहित सर्वाधिक ३४ रन बनाए । हारुन अशरद १४ बलमा ३ चौकासहित २७ रनमा अविजित रहे । जिशान अली २० र यासिम मुर्तजा २६ रनमा आउट भए । बाबर हायत ६ रनमा आउट हुन पुगे ।

सिंगापुरका अम्जद महबुब,जनक प्रकाश र अक्षय पुरीले समान दुई विकेट लिए । एसिया कप छनोटमा हङकङ, युएई, कुवेत र सिंगापुर छन् । लिगको खेलपछि शीर्ष स्थानमा रहने टोलीले अगष्ट २७ देखि युएईमा हुने एसिया कप खेल्न पाउनेछन् । छनोटबाट जाने टोलीले एसिया कपमा भारत र पाकिस्तानसँग खेल्न पाउनेछ । समूह बी मा श्रीलंका, बंगलादेश र अफगानिस्तान छन् ।
यो पनि : जब नेपालले भारत र पाकिस्तानसँग खेल्ने अवसर गुमायो