एजेन्सी – युएईमा जारी टि२० एसिया कप २०२२ को फाइनलमा भारत र पाकिस्तानबीच प्रतिस्पर्धा हुने भएको छ । बुधबार राती पाकिस्तानले अफगानिस्तानमाथि एक विकेटको रोमान्चक जित हात पारेसँगै फाइनल खेल्ने दुई टोलीको निर्धारण भएको हो ।

पाकिस्तान सुपर फोरमा २ खेलमा ४ अंकका साथ दोस्रो स्थानमा छ । श्रीलंका २ खेलमा ४ अंकका साथ नेटरनरेटमा माथि रहँदै शीर्ष स्थानमा छ । प्रतियोगिता अघि उपाधिको प्रमुख दाबेदार मानिएको भारत भने सुपर फोरबाटै बाहिरिएको छ । सुपर फोरमा पाकिस्तान र श्रीलंकासँगको हारले भारत बाहिरिनु परेको हो ।

भारत र अफगानिस्तान समान २ खेलमा जित बिहीन हुँदै तेस्रो र चौथो स्थानमा छन् । एसिया कपको फाइनल आइतबार दुबई इन्टरनेशनल क्रिकेट स्टेडियममा हुनेछ । भारतले सुपर फोरमा आज अफगानिस्तानसँग अन्तिम खेल खेल्दैछ । जुन खेल प्रतिष्ठाको लडाईमात्र हुनेछ ।

सुपर फोरको अन्तिम खेलमा शुक्रबार पाकिस्तान र श्रीलंकाबीच प्रतिस्पर्धा हुनेछ । यी दुई टोलीलाई यो फाइनल अघि अभ्यास र कुन टोली शीर्ष स्थानमा रहने निर्धारण गर्नेछ । पाकिस्तानले सुपर फोरमा भारतलाई ५ विकेट र अफगानिस्तानलाई एक विकेटले हराएको हो ।

श्रीलंकाले अफगानिस्तानलाई ४ विकेट र भारतलाई ६ विकेटले हराउँदै फाइनलमा स्थान पक्का गराएको थियो । प्रमुख बलर जस्प्रित बुमराह र हर्षल पटेल घाइते भएपछि भारतको बलिङ आक्रामण कमजोर बनेको थियो ।

भारतले पाकिस्तानसँग १ सय ८१ रन बनाएपनि त्यसलाई बचाउन सकेन । भारतले दिएको १ सय ८२ रनको लक्ष्य पाकिस्तानले १९.५ ओभरमा ५ विकेट गुमाउँदै पूरा गर्यो । श्रीलंकाविरुद्ध भारतले पहिला ब्याटिङ गर्दै १ सय ७३ रन बनाएपनि एक बल अगाडिनै पराजित भयो । श्रीलंकाले सुपर फोरमा अफगानिस्तानलाई हराउन १ सय ७६ रनको लक्ष्य १९.१ ओभरमा ६ विकेट गुमाउँदै पूरा गरेको थियो ।

यो पनि पढ्नुहोस् : आसिफ अलीले बलरलाई ब्याटले हान्न खोजेपछि…

नसिम नायक बन्दा पाकिस्तान फाइनलमा