एजेन्सी – टेस्ट टोली बंगलादेशले पहिलो टि२० आई खेलमा घरेलु टोली युएईमाथि सात रनको कठिन जित हात पारेको छ । योसँगै दुई टि२० आई खेलको इनिङमा बंगलादेशले १–० को अग्रता लिएको छ ।

जितको लागि १ सय ५९ रनको विजयी लक्ष्य पछ्याएको युएई १९.४ ओभरमा १ सय ५१ रनमा अल आउट भयो । युएईका ओपनर चिराग सुरीले ३४ बलमा ७ चौकासहित सर्वाधिक ३४ रन बनाए ।

एक समय युएई ८ ओभरमा ६६–२ को बलियो अवस्थामा थियो । त्यसपछि भने लगातार विकेट गुमाउँदै १४.३ ओभरमा १०२–७ को दयनीय अवस्थामा पुगेको थियो ।

ओपनर मोहम्मद वासिम १५, अर्यान लर्कान १९, वृत्य अरविन्द १६ र सिपी रिजवान ५ रनमा आउट भए । तल्लोक्रमका अयान अफजल खानले १७ बलमा ३ चौकासहित २५ रनमा आउट भए । बंगलादेशका मेहदी हसन मिराज र शोरिफुल इस्लामले तीन तीन विकेट लिए । मुस्ताफिजुर रहमानले दुई विकेट लिए ।

त्यसअघि दुबई इन्टरनेशनल क्रिकेट स्टेडियममा टस हारेर पहिला ब्याटिङ थालेको बंगलादेशले निर्धारित २० ओभरमा ५ विकेट गुमाउँदै १ सय ५८ रन बनायो । बंगलादेशका युवा खेलाडी अफिफ हुसैनले ५५ बलमा ७ चौका र ३ छक्कासहित सर्वाधिक ७७ रनमा अविजित रहे ।

कप्तान नुरुल हसन सान्टोले २५ बलमा २ चौका र २ छक्कासहित ३५ रनमा अविजित रहे । युएईका कर्तिक मियाप्पनले सर्वाधिक दुई विकेट लिए । दोस्रो खेल मंगलबार हुनेछ । बंगलादेश टि२० विश्वकपको लागि युएईमा अभ्यास गर्न गएको हो ।