काठमाडौं (हाम्रो खेलकुद) – कप्तान ज्ञानेन्द्र मल्लले आफ्नो उच्च लयतालाई निरन्तरता दिएपनि बागमती प्रदेश छनोटमा काठमाडौं अन्तिम खेलमा ललितपुरसँग १८ रनले पराजित हुँदै बाहिरिएको छ ।

मुलपानी क्रिकेट मैदानमा टस जितेर पहिला ब्याटिङ रोजेको ललितपुरले निर्धारित ४० ओभरमा ७ विकेट गुमाउँदै १ सय ८१ रन बनायो । ललितपुरका ओपनर आशुतोष घोईरोइयाले १ सय १५ बलमा ४ चौका र १ छक्कासहित सर्वाधिक ७७ रनको योगदान दिए । विवेक रानामगर ५९ बलमा २ चौका र ३ छक्कासहित ५९ रनमा आउट भए ।

काठमाडौंका दीपक महतोले तीन र प्रतिश जि.सीले दुई विकेट लिए । जितको लागि १ सय ८२ रनको विजयी लक्ष्य पछ्याएको काठमाडौं ३८.३ ओभरमा १ सय ६३ रनमा अल आउट भयो ।

काठमाडौंको लागि ज्ञानेन्द्र मल्लले ७१ बलमा ५ चौका र २ छक्कासहित ५९ रन बनाएपनि टोलीको हार टार्न सकेनन् । ज्ञानेन्द्रले यसअघि भक्तपुरविरुद्ध १ सय १३ र नुवाकोटविरुद्ध ५४ रन बनाएका थिए ।

ललितपुरको लागि हरिहोम ८ ओभरमा ३ मेडनसहित २१ रन खर्चेर ४ विकेट लिए । नन्दन यादवले ७.३ ओभरमा १ मेडनसहित १५ रन खर्चेर ३ विकेट लिए ।

समूह ए मा ललितपुर, भक्तपुर, काठमाडौं र नुवाकोट थिए । समूह बी मा चितवन, मकवानपुर र त्रिभुवन युनिभर्सिटी थिए । शीर्ष दुई टोली फाइनलमा पुगेका छन् । शुक्रबार फाइनलमा मकवानपुर र ललितपुरबीच प्रतिस्पर्धा हुनेछ ।