काठमाडौं (हाम्रो खेलकुद) – ओपनर विनोद भण्डारी र हश्मातुल्लाह शाहिदीको उत्कृष्ट ब्याटिङमा फार वेस्ट युनाइटेडले नेपाल टि२० लिगमा काठमाडौं नाइट्सलाई १ सय ९८ रनको विशाल लक्ष्य दिएको छ।

टियु क्रिकेट मैदानमा टस जितेर पहिला ब्याटिङ रोजेको फार वेस्टले निर्धारित २० ओभरमा ४ विकेट गुमाउँदै १ सय ९७ रन बनायो । फार वेस्टका विनोद भण्डारीले ४४ बलमा ६ चौका र ५ छक्कासहित ७३ रनमा आउट भए । हश्मातुल्लाह शाहिदीले ५७ बलमा ५ चौका र ४ छक्कासहित सर्वाधिक ७६ रन बनाए ।

पहिलो विकेटका लागि फार वेस्टका ओपनर विनोद र हश्मातुल्लाहले १६.३ ओभरमा १ सय ५७ रनको शतकीय साझेदारी गरेका थिए । यो नेपाल टि२० लिगमा कुनैपनि विकेटका लागि भएको उच्च साझेदारी हो । यसअघि जनकपुर रोयल्सका सन्दीप जोरा र चाडविक वाल्टनले फार वेस्ट युनाइटेडविरुद्ध तेस्रो विकेटका लागि १ सय ५१ रनको अविजित शतकीय साझेदारी गरेका थिए ।

त्यस्तै यो नेपाल टि२० लिगको दोस्रो ठूलो योगफल हो । यसअघि काठमाडौंले जनकपुर रोयल्सविरुद्ध २ सय ८ रन बनाएको थियो । करण केसी ८ बलमा ३ छक्कासहित २२ रनमा अविजित रहे ।

काठमाडौंका बसिर अहमदले ४ ओभरमा २४ रन खर्चेर ३ विकेट लिए । अभिनाश बोहराले ४ ओभरमा ४१ रन खर्चेर १ विकेट लिए ।