एजेन्सी – भारतीय किकेट टोलीका युवा ओपनर पृथ्वी शा ले रणजी ट्रफीमा मुम्बईबाट असामविरुद्ध सानदार दोहोरो शतक प्रहार गरेका छन् । टस हारेर पहिला ब्याटिङ थालेको मुम्बईले पहिलो दिनको खेल सकिँदा ९० ओभरमा २ विकेट गुमाउँदै ३ सय ८९ रन बनाएको छ ।

पृथ्वी शा २ सय ८३ बलमा ३३ चौका र १ छक्कासहित २ सय ४० रनमा अविजित छन् । दोस्रो दिन उनको नजर तेहेरो शतकमा हुनेछ । कप्तान अजिक्या रहाणे १ सय ४० बलमा ५ चौकासहित ७३ रनमा अविजित छन् । तेस्रो विकेटका लागि शा र रहाणेले २ सय ९८ बलमा २ सय रनको अविजित शतकीय साझेदारी गरि सकेका छन् ।

अजिक्या रहाणे पनि भारतीय टोलीमा पूनरागमन गर्न संघर्षरत छन् । रहाणे गत जनवरीमा दक्षिण अफ्रिका भ्रमणपछि भारतीय टोलीमा छैनन् । रहाणे भने भारतीय टेस्ट टोलीबाट मात्रै खेल्दै आएका छन् । ओडिआईमा भने रहाणे २०१८ देखि टोलीमा छैनन् ।

शा २०२१ जुलाई श्रीलंका भ्रमणपछि भारतीय टोलीमा छैनन् । इन्डियन प्रियिमर लिग (आइपिएल) मा दिल्ली क्यापिटल्स र घरेलु क्रिकेटमा मुम्बईबाट राम्रो प्रदर्शन गरेपनि उनी भारतीय टोलीमा छैनन् । शा आक्रामक ब्याटिङका लागि चिनिन्छन् ।
भारतीय टोलीमा ओपनरको रुपमा रोहित शर्मा, लोकेश राहुल, शुभमन गिल र शिखर धवन हुँदा शाले मौका पाउन सकेका छैनन् ।

शा भारतलाई २०१८ को यू१९ विश्वकप उपाधि जिताउने कप्तान समेत हुन् । शाको यस पटकको घरेलु प्रतियोगितामा भने प्रदर्शन अपेक्षा भन्दा केहि कमजोर छ ।