काठमाडौं (हाम्रो खेलकुद) – नेपालले अर्को महिना घरेलु मैदान टियुमा नामिबिया र स्कटल्यान्डसँग खेल्ने आइसिसी विश्वकप लिग–२ त्रिकोणात्मक ओडिआई सिरिजको लागि प्रारम्भिक टोली घोषणा गर्दा ७ खेलाडीले पूनरागमन गरेका छन् ।

युवा आक्रामक ब्याटर सिद्धान्त लोहनीले पाँच वर्षपछि सिनियर टोलीको बन्द प्रशिक्षणमा स्थान बनाएका छन् । सिद्धान्त ओडिआई क्रिकेटमा भने पहिलो पटक मौका पाएका छन् । २८ सदस्य टोली प्रशिक्षणमा बोलाउँदा ७ खेलाडीले बन्द प्रशिक्षणमा पूनरागमन गरेका हुन् ।

गत कार्तिकमा भएको प्रधानमन्त्री कप र नेपाल टि२० लिगको प्रदर्शनलाई मुख्य आधार बनाईएर छनोट समितिले प्रशिक्षण बोलाएको छ । सिनियर टोलीमा पूनरागन गरेका ८ खेलाडीको पछिल्लो समयको प्रदर्शन र उनीहरुको बारे छोटकरीमा जानकारी यस प्रकार छ ।

७. शरद भेषावकर (ब्याटर)

नेपालका वर्तमान समयका अनुभवी खेलाडी शरद भेषावकरले क्याम्पमा पूनरागमन गरेका छन् । शरद पछिल्लो समय नेपाली क्रिकेट टोलीमा गतवर्ष ओमान भ्रमणमा थिए । त्यस सिरिजमा चोटका कारण विश्वकप छनोट गुमाएका थिए । कमजोर प्रदर्शनका कारण त्यसपछि पुन टोलीमा पर्न सकेनन् ।

पछिल्लो समय पनि शरदको घरेलु क्रिकेटमा प्रदर्शन भने राम्रो छैन । पछिल्ला दुई घरेलु प्रतियोगिता प्रधानमन्त्री कपमा ४ इनिङमा ४१ र नेपाल टि२० लिगमा ५ खेलमा २४ रन बनाएका थिए । सिनियर टोलीको ब्याटिङक्रम हेर्दा स्थान बनाउन भने कठिन देखिन्छ ।

६. विक्रम सोब (बलर)

तीव्र गतिका बलर विक्रम सोब पछिल्लो पटक गत जेठमा टोलीमा थिए । अमेरिका भ्रमणको लागि टोलीमा भएपनि चोटका कारण अन्तिम समयमा बाहिरिनु परेको थियो । त्यसपछि भने उनी टोलीमा थिएनन् ।

प्रधानमन्त्री कपमा विक्रम सोेबले ५ खेलमा ११ विकेट लिएका थिए । नेपाल टि२० लिगमा भने सोब थिएनन् । विक्रमलाई पनि अन्तिम टोलीमा स्थान बनाउन सहज छैन । तीव्र गतिका बलरमा सोमपाल कामी, करण केसी, किशोर महतो, कमलसिंह ऐरी, गुलशन झालगायतका बलर छन् ।

५. भुवन कार्की (बलर)

स्पिनर भुवन कार्कीले पनि लामो समयपछि प्रशिक्षणमा स्थान बनाएका छन् । भुवनले २०२० इस्टर्न रिजनमा थाईल्यान्डविरुद्ध टोलीमा डेब्यू गरेका थिए । तर भुवनले क्याम्पमा भने स्थान बनाउन सकेका थिएनन् ।

प्रधानमन्त्री कपमा एपिएफलाई च्याम्पियन बनाउन भुवनले ६ खेलमा १० विकेट लिएका थिए । तल्लोक्रममा ब्याटिङमा पनि राम्रो प्रदर्शन गरेका थिए । नेपाल टि२० लिगमा फार वेस्टबाट ६ विकेट लिएका थिए । भुवन तल्लोक्रममा राम्रो ब्याटिङसँगै फिल्डिङ पनि उत्कृष्ट गर्ने गर्दछन् । भुवनलाई पनि अन्तिम टोलीमा स्थान बनाउन सहज भने देखिदैन ।

४. अनिल शाह (विकेटकिपर)

विकेटकिपर अनिल कुमार शाहले पनि क्याम्पमा फर्किएका छन् । अनिल पछिल्लो पटक नेपाली टोलीमा गत मार्चमा पपुवा न्युगिनीसँगको दुई ओडिआई खेलको सिरिजमा नेपाली टोलीमा थिए । दुई खेलमा ६ र एक रनमा आउट भएपछि भने टोलीबाट बाहिरिएका थिए ।

अनिल यसै सिजनदेखि नेपाल पुलिस क्लब छाडेर मधेश प्रदेशबाट प्रधानमन्त्री कप खेलेका थिए । प्रधानमन्त्री कपमा उनले ५ खेलमा १ सय ३९ रन बनाएका थिए । पहिलो खेलमा प्रदेश एकविरुद्ध ६१ रन बनाएका थिए । लुम्बिनीले उपाधि जित्दा अनिलले ११ खेलमा १ सय ५३ रन बनाएका थिए । अनिललाई पनि टोलीमा स्थान बनाउन सहज छैन । दुई विकेटकिपर अर्जुन साउद र आसिफ शेख टोलीमा छन् ।

३. सिद्धान्त लोहनी (ब्याटर)

आक्रामक ब्याटर सिद्धान्त लोहनीले २०१७ पछि नेपाली टोलीको प्रशिक्षणमा मौका पाएका छन् । सिद्धान्तले २०१७ पछि क्याम्पमा मौका पाएका हुन् । त्यसपछि सिद्धान्तको चोट र कमजोर प्रदर्शनको कारण टोलीमा पर्न सकेका थिएनन् । तर पछिल्ला दुई घरेलु प्रतियोगितामा राम्रो प्रदर्शन गरेपछि क्याम्पमा फर्किएका हुन् ।

प्रधानमन्त्री कपमा सिद्धान्तले प्रदेश एकबाट ४ खेलमा दुई अर्धशतकसहित १ सय ४६ रन बनाएका थिए । सिद्धान्तले बागमती प्रदेशविरुद्ध ४० खेलमा ३ चौका र ८ छक्कासहित ७२ रनको विष्फोटक इनिङ खेलेका थिए । लुम्बिनी प्रदेशविरुद्ध ६० बलमा १० चौका र २ छक्कासहित ७४ रनको इनिङ खेलेका थिए । नेपाल टि२० लिगमा पोखराबाट १ सय ४८ रन बनाएका थिए । सिद्धान्तले लेग स्पिन पनि गर्ने गर्दछन् । क्याम्पमा राम्रो प्रभाव छाड्न सके पहिलो ओडिआई खेल खेल्ने सपना पूरा हुनसक्छ ।

२. सन्दीप जोरा (ब्याटर)

युवा ब्याटर सन्दीप जोरा पनि लामो समयपछि क्याम्पमा फर्किएका थिए । जोरा अन्तिम पटक नेपाली टोलीमा २०२१ को अप्रिलमा टियु मैदानमा भएको नेदरल्यान्ड्स र मलेसियासँग त्रिकोणात्मक टि२० आई सिरिजमा थिए । त्यस सिरिजमा खेल्ने मौका भने पाएका थिएनन् । तर त्यसपछि भने उनी टोलीमा थिएनन् ।

जोराले २०१९ मा युएईविरुद्ध टि२० आई खेलमा डेब्यू गर्दै अर्धशतक बनाएका थिए । त्यसपछि ओमानमा भएको पाँच देशसम्मिलित टि२० सिरिज पछि खेल्ने मौका पाएनन् । एपिएफबाट घरेलु क्रिकेट खेल्ने जोराले राम्रो प्रदर्शन गर्दै आएका छन् । प्रधानमन्त्री कपमा एपिएफलाई उपाधि जिताउन सन्दीपले ६ खेलमा एक अर्धशतकसहित १ सय रन बनाएका थिए । जोराले आर्मीविरुद्ध ५० रन जोडेका थिए ।

नेपाल टि२० लिगमा जनकपुर रोयल्सबाट राम्रो प्रदर्शन गर्दै ११ खेलमा २ अर्धशतकसहित २ सय ५८ रन बनाएका थिए । नेपाल टि२० लिगमा राम्रो प्रदर्शनपछि क्याम्पमा बोलाएको छ । तर सिनियर टोलीको ब्याटिङलाइन अप हेर्दा अन्तिम टोलीमा स्थान बनाउन सहज भने हुनेछैन ।

१. अभिनाश बोहरा (बलर)

तीव्र गतिका बलर अभिनाश बोहराले गतवर्ष टि२० विश्वकप छनोट पछि पहिलो पटक सिनियर टोलीको क्याम्पमा मौका पाएका छन् । टि२० विश्वकप छनोट पछि अभिनाश टोलीमा थिएनन् । प्रधानमन्त्री कप गुमाएका अभिनाशले नेपाल टि२० लिगमा उत्कृष्ट प्रदर्शन गर्दै पूनरागमन गरेका हुन् । नेपाल टि२० लिगमा काठमाडौं नाइट्सबाट ११ खेलमा १९ विकेट लिँदै शीर्ष स्थानमा रहेका थिए । प्रतियोगिता उत्कृष्ट बलर चुनिएका अभिनाशले लामो समयपछि क्याम्पमा मौका पाएका हुन् ।