काठमाडौं (हाम्रो खेलकुद) – नेपाली क्रिकेट टोलीका अनुभवी खेलाडी शरद भेषावकर नेपाल क्रिकेट संघ (क्यान) को ग्रेड विभाजन (केन्द्रिय सम्झौता) बाट बाहिरिएका छन् । शरद पहिलो पटक ग्रेडबाट बाहिरिएका हुन् ।
आइसिसी टि२० विश्वकप २०१४ खेलेपछि नेपालमा ग्रेड सुरु भएको थियो । २०१५ देखि सुरु भएको ग्रेडमा शरद पहिलो पटक बाहिरिएका हुन् । शरद पछिल्लो पटक २०२२ र २०२१ मा ग्रेड बी मा थिए । त्यसअघि शरद ग्रेड ए मा रहँदै आएका थिए ।
नेपालका अनुभवी खेलाडी शरद झण्डै एक वर्षपछि सिनियर टोलीमा पनि छैनन् । शरदले पछिल्लो पटक अन्तर्राष्ट्रिय खेल गतवर्ष ओमानमा आइसिसी टि२० विश्वकप ग्लोबल छनोट खेल्नुअघि चार देश समिम्मिलत टि२० आई सिरिज खेलेका थिए ।
शरदले २०२२ मा तीन टि२० आई खेलमा दुई खेलमा अविजित रहँदै १५ रन बनाएका थिए ।
उनले गतवर्ष ओमानविरुद्ध ४ रनमा अविजित, युएईविरुद्ध १० रनमा अविजित र आयरल्यान्डसँग एक रनमा आउट भए । आयरल्यान्डसँगको खेल नै उनले खेलेको अन्तिम खेल हो । शरदले ओडिआई भने २०२१ को सेप्टेम्बरमा अल अमरेतमा ओमानविरुद्ध खेलेका थिए ।
नेपालका अनुभवी खेलाडी शरदले मात्रै ४ ओडिआई खेल खेलेका छन् । उनले टि२० आई भने २० खेल खेलेका छन् । दुई सातापछि टियु क्रिकेट मैदानमा हुने आइसिसी विश्वकप लिग २ त्रिकोणात्मक ओडिआई सिरिज अन्तर्गत स्कटल्यान्ड र नामिबियाविरुद्ध सिरिजको लागि शरद अन्तिम २८ मा छन् ।
तीव्र गतिका बलर विक्रम सोबपनि ग्रेडबाट बाहिरिएका छन् । विक्रम गत वर्ष ग्रेड सी मा थिए । विक्रमले २०२२ मा एकमात्रै ओडिआई युएईविरुद्ध खेलेका थिए । त्यस्तै अलराउन्डर पवन सरार्फ पनि ग्रेडबाट बाहिरिएका छन् । पवन सरार्फले २०२२ मा पाँच ओडिआई खेलमा १९ रन बनाउँदा ४ विकेट लिएका थिए ।
पवनले २०२२ को टि२० आईमा पाँच खेलमा ४१ रन बनाउनुको साथै एक विकेट लिएका थिए । गतवर्ष पवन ग्रेड सी मा थिए ।
साहब आलम र सुशान भारी पनि ग्रेडबाट बाहिरिएका छन् । स्पिनर साहब आलमले २०२२ मा तीन टि२० आई खेलमा दुई विकेट लिएका थिए ।
सुशान भारी २०२२ मा दुई ओडिआई खेल खेल्दा विकेटविहीन बनेका थिए । साहब र सुशान यसअघि ग्रेड सी मा थिए । क्यानले २०२३ को जनवरी देखि जुनसम्म केन्द्रिय सम्झौता गरेको जनाएको छ ।
२०२३ जनवरी देखि जुनसम्म ग्रेड :
ग्रेड ए : रोहित पौडेल, सोमपाल कामी, करण केसी, दीपेन्द्रसिंह ऐरी र आशिफ शेख
ग्रेड बी : आरिफ शेख, कुशल भुर्तेल, ज्ञानेन्द्र मल्ल
ग्रेड सी : कमलसिंह ऐरी, विनोद भण्डारी, गुलशन झा, अर्जुन साउद, अभिनाश बोहरा, ललित नारायण राजवंशी, कुशल मल्ल, देव खनाल, सागर ढकाल र विवेक यादव ।
