काठमाडौं (हाम्रो खेलकुद) – नेपालले आइसिसी विश्वकप लिग–२ त्रिकोणात्मक ओडिआई सिरिज अन्तर्गत आज नामिबियासँग खेल्दैछ । खेल बिहान ९ बजे टियु क्रिकेट मैदानमा सुरु हुनेछ । घरेलु टोली नेपाल नामिबियामाथि सानदार जित हात पार्ने सोचका साथ मैदान उत्रनेछ ।

नेपालले ओडिआईमा नामिबियालाई पहिलो पटक हराउन चाहन्छ । नेपालले चार ओडिआई खेल खेल्दा नामिबियासँग तीन हार र एक खेलमा वर्षाको कारण रद्ध छ । नेपाल घरेलु मैदान, वातावरण र समर्थकको भरपूर्ण फाइदा उठाउने सोचमा हुनेछ।नामिबिया २०१६ पछि पटक नेपालमा खेल्दैछ । २०१६ मा दुबै खेलमा नामिबिया नेपालसँग पराजित भएको थियो ।

नेपाल २४ खेलमा ८ मा जित र १४ मा हारसहित १८ अंकका साथ छैटौं स्थानमा छ । नेपालले अव १२ खेल खेल्न बाँकी छ । जसमा चार खेल युएईमा गएर खेल्नेछ । ८ खेल घरेलु मैदानमा हुनेछन् । नेपालले सबै खेल जित्न सके शीर्ष तीनको सम्भावना अंक गणीतिय देखिन्छ । शीर्ष पाँचमा पर्दै ओडिआई मान्यता जोगाउन कम्तिमा ९ खेल जित्नुपर्ने हुन्छ । त्यसैले नेपाल पहिलो खेलमै सानदार जितका साथ पुरै मेमोन्ट आफ्नो हातमा राख्न चाहन्छ ।

नामिबिया ३० खेलमा १८ मा जित र ११ मा हारका साथ ३७ अंक जोड्दै तेस्रो स्थानमा छ । नामिबिया नेपाल भ्रमणमा शीर्ष तीन औपचारिक रुपमा पक्का गर्ने लक्ष्यमा हुनेछ ।

मुख्य प्रशिक्षक मोन्टी देशाईको यो पहिलो प्रतियोगिता हो । देशाईलाई खेलाडी चिन्ने र कमजोरी सुधार गर्ने राम्रो अवसर समेत हो । बलात्कार आरोप लागेका क्रिकेटर सन्दीप लामिछाने पाँच महिनापछि मैदान फर्किदैछन् । उनको प्रदर्शन निकै महत्वपूर्ण रुपमा हेरिएको छ । राम्रो प्रदर्शनको लागि दबाब पनि हुनेछ ।

नेपालका प्रमुख ब्याटरमा रोहित पौडेल, ज्ञानेन्द्र मल्ल र दीपेन्द्रसिंह ऐरी छन् । यी तीन मध्य एकले ठूलो इनिङ खेल्नुपर्ने हुन्छ । ओपनरमा आसिफ शेख र कुशल भुर्तेल हुनेछन् । ओपनरबाट नेपाल राम्रो सुरुवात चाहन्छ । पछिल्लो समय नामिबिया भ्रमणमा तल्लोक्रममा खेलेका कुशल विकेटकिपर अर्जुन साउद टोलीबाट बाहिरिएपछि फर्किएका हुन् । सर्वाधिक अनुभवी ब्याटर ज्ञानेन्द्र मल्लबाट नेपाल घरेलु मैदानमा उत्कृष्ट प्रदर्शन चाहन्छ । त्योे टोलीको लागि आवश्यक पनि छ ।

रोहित पौडेल र दीपेन्द्रसिंह ऐरीको ब्याटिङले मध्यक्रम निर्धारण गर्ने देखिन्छ । यस पटक आरिफ शेख टोलीमा छैनन् । त्यो स्थानमा कुशल मल्ल खेल्न सक्छन् । कुशल बायाँ हाते ब्याटरसँगै स्पिनको राम्रो विकल्प हुन् । उता नामिबियाको टोलीमा स्पिनर बेनार्ड शोल्ट्ज र तीव्र गतिका बलर रुबेन ट्रम्पलम्यान छन् । रणनीतिक हिसाबमा पनि कुशल सफल हुनसक्छन् ।

तीव्र गतिका बलरमा करण केसी र सोमपालको स्थान पक्का छ । गुलशन झाले पछिल्ला केहि खेलमा राम्रो गरेको हुँदा उनलाई पनि मौका दिनसक्छ । तीन तीव्र गतिका बलर खेलाउँदा नेपालको ब्याटिङमा गहिराई हुनेछ । स्पिनरमा सन्दीपको स्थान पक्का छ । ललितनारायण राजवंशी र सूर्य तामाङ मध्य एकले खेल्ने सम्भावना छ ।

यता नामिबियाका कप्तान जेरार्ड इरास्मसको विकेट नेपाललाई धेरै महत्वपूर्ण हुनेछ । २०२२ को आइसिसी क्रिकेटर अफ द एसोसियटको उपाधि जितेका जेरार्डले सानदार प्रदर्शन गर्दै आएका छन् । २०२२ मा ओडिआई क्रिकेटमा सर्वाधिक रन बनाउने जेरार्ड मध्यक्रममा राम्रो स्पिन खेल्ने गर्दछन् । उनले २०१६ मा नेपालमा खेलि सकेका छन् ।

जेन ग्रिन, माइकल भान लिगेन र जेन निकोल लोफ्टी राम्रो ब्याटिङका लागि चिनिन्छन् । बायाँ हाते स्पिनर बेनार्डबाट नेपाल बच्नुपर्ने हुन्छ । उनले गत जुलाईमा नेपालविरुद्ध एकै खेलमा पाँच विकेट लिएका थिए । तीव्र गतिका बलर रुबेन ट्रम्पलम्यान पनि नायक बन्नसक्छन् ।

नेपालले दोस्रो खेल स्कटल्यान्डसँग शुक्रबार र नामिबियासँग शनिबार खेल्नेछ । स्कटल्यान्डसँग अन्तिम खेल मंगलबार खेल्नेछ ।

हेड टु हेड :

नेपालले लिग-२ मा नामिबियालाई हराउन सकेको छैन । खेलेको चार मध्य तीन खेलमा नामिबिया विजयी भएको छ । एक खेल वर्षाको कारण नतिजा विहीन बनेको थियो । गत जुलाईमा स्कटल्यान्डमा नामिबियाले नेपाललाई ४० र ६३ रनले पराजित गरेको थियो ।

गत डिसेम्बरमा घरेलु मैदानमा नामिबियाको पहिलो खेल वर्षाले रद्द हुँदा दोस्रो खेलमा ८६ रनले हराएको थियो । नामिबियासँग सबै खेलमा लक्ष्य पछ्याउँदा नेपाल पराजित भएको थियो । त्यसैले नेपालले आजको खेलमा टस जितेको खण्डमा पहिला ब्याटिङ गर्ने निर्णय लिनसक्छ । नेपालमा नामिबियाको असली परिक्षा समेत हुनेछ ।

नेपालले हालसम्म ७ देशसँग ओडिआई खेल खेलेको छ । जसमा हराउन नसकेको नामिबिया मात्रै एक टोली हो । नेपालले नेदरल्यान्ड्स, स्कटल्यान्ड, नामिबिया, ओमान, पपुवा न्युगिनी, युएई र अमेरिकासँग हालसम्म ओडिआई खेल खेलेको छ।

प्रत्यक्ष प्रसारण

नेपालमा प्रत्यक्ष प्रसारणको जिम्मा कान्तिपुर टेलिभिजनले गर्नेछ । विदेशमा फ्यान कोड, आइसिसी टिभी र कान्तिपुरबाट हेर्न सकिनेछ ।

टिकट :

टिकटको मूल्य १ सय ५० रुपैयाँ राखिएको छ । जुन टिकट सामान्य दर्शकको लागि राखिएको छ । ३ सय ५० रुपैयाँ तिर्नेले भित्र कुर्चीमा बसेर हेर्न पाउनेछन् ।

नामिबियाको टोली :

जेरार्ड इरास्मस (कप्तान), लोहान लरेन्स, टांगेनी लुमामेनी, जेन ग्रिन, माइकल भान लिगेन, जान फ्रिलिंक, बेनार्ड शोल्ट्स, हेलाओ या फ्रान्स, बेन सिकांगो, कार्ल विक्रेनस्टोक, जोशुआन जुलिउस, निकोल लोफ्टी इआटोन, रुबेन ट्रम्पलम्यान र शन फुसे ।

नेपालको टोली :

रोहित पौडेल (कप्तान), कुशल भुर्तेल, आसिफ शेख, ज्ञानेन्द्र मल्ल, कुशल मल्ल, दीपेन्द्रसिंह ऐरी, सन्दीप जोरा, सोमपाल कामी, करण केसी, ललितनारायण राजवंशी, सन्दीप लामिछाने, गुलशन झा, भीम सार्की र सूर्य तामाङ ।

यो पनि : नामिबियाविरुद्ध नेपालको सम्भावित प्लेइङ-११

दीपेन्द्रको ब्याट खुल्ने आशा

घरेलु मैदानको फाइदा उठाउने सोचमा नेपाल

नामिबियाका प्रमुख दुई स्टार नआउने, नेपाललाई फाइदा