काठमाडौैं (हाम्रो खेलकुद) – स्कटल्यान्डले आइसिसी विश्वकप लिग २ त्रिकोणात्मक ओडिआई सिरिजमा नामिबियाविरुद्ध मध्यम प्रदर्शन गरेको छ । टियु क्रिकेट मैदानमा टस हारेर पहिला ब्याटिङको निम्तो पाएको स्कटल्यान्डले सुरुवाती २३ ओभरमा ३ विकेट गुमाउँदै ९२ रन बनाएको छ।

स्कटल्यान्डका कप्तान रिची बेरिंग्टन र विकेटकिपर म्याथ्यु क्रस ९–९ रनमा अविजित छन् । क्रिसटोपर म्याकब्राइड ७५ बलमा ७ चौकासहित ४७ रनमा आउट भए । तेस्रो विकेटका लागि रिची र क्रिसटोफरले ४३ रनको साझेदारी गरेका थिए ।

म्याकब्राइड स्पिनर पिक्की या फ्रान्सको बलमा क्याच आउट भएका थिए । तीव्र गतिका बलर टांगेनी लुगांमेनीले ओपनर काइल कोट्जरलाई तेस्रो बलमै शून्यमा क्याच गराएका थिए ।

उनी एज लागेर विकेटकिपर जेन ग्रिनबाट क्याच आउट भएका थिए । डेब्यू खेल खेलेका लियाम नेलर २० रनमा बोल्ड आउट भए । दुई खेलाडी ज्याक जार्विस र क्रिस सोल चोेटका कारण खेल्न नसक्ने भएपछि उनले डेब्यू पाएका थिए ।

तीव्र गतिका बलर रुबेन ट्रम्पलम्यानले उनलाई बोल्ड आउट गरे । उनले २१ बलमा ४ चाका हाने । स्कटल्यान्डले पहिलो खेलमा नामिबियालाई १० विकेटले हराएको थियो । स्कटल्यान्ड नेपालसँग तीन विकेटले पराजित भएको थियो।

नामिबिया नेपालसँग भने दुई र तीन विकेटले पराजित भएको थियो । स्कटल्यान्डले अन्तिम खेल नेपालसँग मंगलबार खेल्नेछ। स्कटल्यान्ड तीन खेल अगावै विश्वकप लिग २ को च्याम्पियन बनेको थियो । आजको खेल स्कटल्यान्डले जित्दा नेपाललाई फाइदा पुग्नेछ ।