एजेन्सी – इंग्ल्यान्डका युवा ब्याटर ह्यारी ब्रुक र अनुभवी ब्याटर जो रुटको सानदार शतकमा इंग्ल्यान्डले दोस्रो टेस्ट खेलमा न्युजिल्यान्डविरुद्ध उत्कृष्ट प्रदर्शन गरेको छ । वेलिंग्टनमा टस हारेर पहिला ब्याटिङको निम्तो पाएको इंग्ल्यान्डले पहिलो दिन मात्रै ६५ ओभरमा ३ विकेट गुमाउँदै ३ सय १५ रन बनाएको छ।

युवा ब्याटर ह्यारी ब्रुक १ सय ६९ बलमा २४ चौका र ५ छक्कासहित १ सय ८४ रनमा अविजित छन् । ब्रुक आफ्नो करिअरको पहिलो दोहोरो शतक प्रहार गर्न मात्रै १६ रनले टाढा छन् । अनुभवी ब्याटर जो रुट १ सय ८२ बलमा ७ चौकासहित १ सय १ रनमा अविजित छन् । रुटको यो टेस्ट करिअरको २९ औं शतक हो । ह्यारी ब्रुकको चौथो शतक हो ।

एक समय २१–३ को दयनीय अवस्थामा पुगेको इंग्ल्यान्डलाई सानदार पूनरागमन गराउन चौथो विकेटका लागि ब्रुक र रुटले ३ सय ५० बलमा २ सय ९४ रनको साझेदारी गरेका छन् ।

वर्षाको कारण पहिलो दिन अन्तिम सेसन भने हुन सकेन । इंग्ल्यान्डले पछिल्लो एक वर्षमा विश्व टेस्ट क्रिकेटमै फरक रुपमा प्रस्तुत हुँदै विष्फोटक ब्याटिङ गर्दै आएको छ । विष्फोटक शैलीलाई इंग्ल्यान्डले निरन्तरता दिएको छ ।

तीव्र गतिका बलर म्याट हेनरीले ओपनर ज्याक क्रलीलाई २ र तेस्रो नम्बरका ब्याटर ओली पोपलाई १० रनमा क्याच आउट गराएका थिए । बेन डकेट कप्तान टिम साउथीको बलमा ९ रनमा क्याच आउट भए । दुई टेस्ट खेलको सिरिजमा इंग्ल्यान्ड १(० ले अघि छ । पहिलो खेलमा इंग्ल्यान्ड २ सय ६७ रनले विजयी भएको थियो ।